The Definitive Guide to Living in the Capital , Cairo , Egypt

عشان تشتري فستان حلو في القاهرة النهاردة
مشكلة عويصة! أولاً لأن السوق غرقان بفساتين ذوقها مش حلو والخامات المستخدمة
مؤذية للبشرة! وكتير من المصممين المحليين اللي أسعارهم متاحة للبشر العاديين
المتوسطين الدخل٬ لسة ما عندهمش المهنية اللي تخلي الفستان مظبوط في المقاسات والشكل بحيث يبرز الجميل ويخفي العيوب على قدر الإمكان. «بيرل دور –
Perle D’Or» بـ يحل المشكلة دي جزئياً.

المحل أزعم انه من القليلين أو حتى الوحيد اللي
فيه تشكيلة في منتهى الرقي٬ تشكيلة في قمة التنوع٬ خامات هايلة وموديلات صاروخية!
المحل ليه 4 فروع: 2 في مصر الجديدة٬ واحد في مدينة نصر وواحد في 6 أكتوبر٬ وكل
فرع فيه تشكيلة مختلفة ومتميزة جداً. احنا روحنا فرع مدينة نصر٬ وده في «سيتي
ستارز –  City Stars» وفرع شارع الميرغني اللي
في مصر الجديدة وبالتحديد في ممر مدخله إما من شارع الميرغني نفسه عند «صلصة – Salsa» بتاع العصير او من شارع الحرية
المشهور بمحلات اللبس والسواريهات. المحلين مساحتهم صغيرة٬ وعارضين فيها أكبر قدر
من الفساتين٬ وفعلاً عندهم فساتين أكتر كتير من محلات تانية أكبر بكتير. الفساتين
كلها مستوردة من أمريكا٬ والموديلات كلها عالمية وجميلة. ذوق الفساتين عالي ومميز٬
الفساتين مفيش فيها حاجة فانكي أو غريبة٬ لكن كلها رائعة.

فيه فساتين معمولة من خامات غالية زي التفتا
والفستان من القماش ده ممكن يوصل سعره لـ12 ألف جنيه! بس ما تـ تخضوش المكان
أسعاره مش كلها كده. الفساتين بـ تبدأ من حوالي 2500 جنيه لما فوق. القصير زيه زي
الطويل برضه غالي. والطويل بـ يلعب في 2700 لو بسيط و4500 لو معقد شوية. وعندهم
مقاسات كبيرة وصغيرة٬ والفساتين بالمناسبة فيه منها المناسب للكبار والشباب.

الخدمة في المكان هايلة. المسئولين عن البيع
مضيافين وبـ يساعدوا الزبون بكل اللي يقدروا يعملوه٬ ولذاذ مستعدين يزودوك
بالمعلومات اللي انت عاوزها من غير ما يتضايقوا من أسئلتك الكتيرة. وكلهم بنات على
فكرة. وكمان لو لوحدك هـ يدوك رأيهم في الفستان بصدق وبطريقة كويسة. المكان كمان
بـ يعمل التغييرات اللي محتاجها الفستان (بتكلفة إضافية حسب التغيير)٬ لكن الشخص
المسؤول عن التغييرات مش متاح كل أيام الأسبوع!