The Definitive Guide to Living in the Capital , Cairo , Egypt

في الفترة الأخيرة، أصبحت كلمة “بورصة”، بتتردد كثير، وخصوصًا بين الشباب، والمهتمين بسوق المال، ولكن رغم كده فيه ناس كتير ماتعرفش معناها، علشان كده هنقول لكم في السطور الجاية، وببساطة شديدة، “يعنى إيه بورصة؟”.

شوف يا سيدي، بحسب الخبير المصري في البورصة، محمد عبد الهادي، البورصة باختصار هى سوق تبادل “بيع وشراء”، لرؤوس الأموال، وهي عبارة عن عدة منتجات، منها الأسهم، والسندات، وصناديق الاستثمار.

والبورصة هي مكان بيجتمع فيه كل اللي عاوز يبيع أو يشتري حصص فى الشركات أو رؤوس أموال، وده في مكان حقيقى مش افتراضي، وهو في الحالة دي مقر البورصة، اللي بيتم فيه التعامل مع ملايين المعاملات يوميًا، ومع التقدم في التكنولوجيا، أصبح فيه نشاط كبير لحركة البيع والشراء بالبورصة عن طريق الإنترنت بدل من التواجد في مبنى البورصة.

وبيضيف “عبد الهادي” في حواره مع كايرو 360 إنه بيتم البيع والشراء في البورصة من خلال سمسار مسجل بشكل رسمي في البورصة، ومصرح له بالبيع والشراء لحساب العميل، وفي كل دولة فيه بورصة أوراق مالية، ومن أشهرها بورصة لندن، وبورصة نيويورك، وبورصة طوكيو، والتعاملات المالية بتتم في البورصة مقابل نسبة مئوية بتحصل عليها البورصة من المتعاملين، وطبعًا بيحصل السمسار إما على عمولة أو هامش من ربح العميل، طبقا لاتفاقه معاه.

وعن أنواع البورصات، بيقول خبير البورصة محمد عبد الهادي، إنه فيه أكتر من نوع بورصة، وبتعتبر بورصة الأوراق المالية هى الأشهر، وفيه كمان بورصة السلع كالبترول، والقمح، والذرة، كمان فيه بورصة العملات المعروفة بالـ”فوركس”.

طيب لو عاوز تشتغل أو تشغل فلوسك في البورصة تعمل إيه؟ ده اللي هنعرفه في المقال الجاي.. تابعونا.