The Definitive Guide to Living in the Capital , Cairo , Egypt

في الفترة الأخيرة، الكلام كان كتير على موضوع أسعار العربيات سواء المستعملة أو الجديدة، وعلى أنسب وقت ممكن تشتري فيه عربية، ويا ترى أشتري عربيه بالبنزين عادي زي الناس، ولا أستنى وأجيب عربية بالكهرباء؟؟

وبدأت فعلاً العربيات الكهربائية تنزل وتمشي في شوارع مصر، لكن للأسف يا فرحة ما تمت، العربيات الكهربائية نزلت بأسعار مبالغ فيها جداً، ويمكن كمان أغلى من العربيات العادية، وده طبعًا بسبب إن تقريبًا مش بتحتاج صيانة زي غيرها من العربيات، ده غير توفيرها في البنزين اللي مش هتحطه أساسًا، وكمان شوية أوبشن ورفاهية، وده خلى سعرها مش في متناول الجميع.

ومن مشكلة السعر تحديدًا، انطلقت شركة “جيوان إليكتريك” الصينية في محاولة لتصنيع أرخص عربية كهربائية في السوق المصري، وفعلًا نجحت، صحيح ممكن تكون مش بتنافس غيرها من العربيات الكهربائية اللي بتنتجها الشركات العالمية التانية، لكن تفضل خطوة في اتجاه حلم أي حد بإنه يكون عنده عربية بالكهرباء.

الشركة سمت عربيتها الجديدة “Weep” على وزن “Jeep”  لإن في شبه كبير بينهم من حيث الشكل بس، علشان دماغك ماتروحش لبعيد، لكن مافيش أي شبه خالص من حيث الإمكانيات أو السعر.

“Weep” نزلت فعليًا في السوق المصري من فترة مش بعيدة أوي، ونزلت بسعر منافس جداً، بتبدأ من 115 ألف لـ 170 ألف لأ وممكن تقسطهم كمان من سنة لحد 5 سنين، وطبعًا السعر بيختلف على حسب الموديل، واللي بيكون اتنين كرسي أو أربعة كرسي، وكمان على حسب السرعة القصوى للعربية واللي ممكن تختار منها إما 50 كيلومتر في الساعة، أو 80 كيلومتر في الساعة، وطبعاً الأوبشن والكماليات المختلفة الموجودة في العربية زي التكييف والباور وكاميرا خلفية وأمامية و نظام معلومات “dvr” وسقف بانوراما، ومرايات ضم بالكهرباء.

بالنسبة لقدرة العربية فهي بتشحن من أي فيشه في البيت، وبتاخد من 6 لـ 8 ساعات شحن، بتكلفة تقريبًا من 5 لـ 10 جنية، والشحنه الواحدة دي بتكفيك لمسافة من 80 كم لـ 120 كم على حسب قدرة الموتور وسرعة العربية.

طبعًا سألنا عن موضوع السرعة القصوى للعربية، وازاي إن سرعتها القصوى 80 كيلومتر بس، وكان رد الشركة إن أفضل استخدام للعربية دي بيكون جوه كومباوند سكني، أو مكان مقفول، باعتبارها بديل “مقفول” لعربيات الجولف، ده غير ان الشركة لسه ما استخرجتش التصاريح اللازمة لترخيص العربية في المرور، وبالتالي لو روحت ترخصها في المرور، هيقولولك مالهاش ورق، وبالتالي مش هينفع تمشي بيها في طرق عمومية أو سريعة.

لو عايز تجرب العربية بنفسك، وتعرف معلومات أكتر عنها ممكن تدوس هنا.