The Definitive Guide to Living in the Capital , Cairo , Egypt

الكنافة في مصر من زمان جدًا، من أول مرة اتعملت فيها كهدية للسلطان الفاطمي للترحيب بيه في مصر، وإحنا كمصريين اتعودنا نعملها بالشربات، لكن دلوقتي بقت تتعمل بالشوكولاتة والريد فيلفت والآيس كريم. كل سنة الإختراعات بتزيد، والمنافسة بتشتد! هنعرض عليكم الجديد في اختراعات الكنافة وجربوا وقولوا لنا رأيكم.

مولتن كنافة بالنوتيلا  من كاروسيل – Carousel

الحقيقة إحنا أول ما شوفنا الصورة دي قلبنا رقص من فرحته، وخطتنا للرجيم خافت من اللي هيحصل لها بعد ما نرتكب الجريمة دي، بس تجربة أنك تفتح الكنافة فينفجر منها بركان شوكولاتة لذيذة دي ما تتفوتش أبدًا يا جماعة.

كنافة بالبقلاوة من ليكلير باريس – L'Éclair Paris

يعنى مش هنحرمك من القرمشة أبدًا ولا من طعامة منتجات ليكلير باريس والجديد في التارت دي أنك ممكن تتطلبها بالشوكولاتة والكريمة والبقلاوة من غير الكنافة أو بالكنافة بس لازم تطلبها قبلها بيوم علشان تجهز، ونتمنى أن كمية السكر تكون مناسبة وما تكونش مبالغ فيها.

كنافة بالنوجا من لا بوار – La Poire

لابوار السنة دي بيتحدانا باختراع الكنافة بالنوجا، هل يا ترى هيكون سكر زيادة عن اللزوم ولا تركيبة فريدة هنحبها ونجيبها كل رمضان؟ هو ده اللي هتعرفه لما تجرب اختراع لابوار.

كنافة بالآيس كريم والمانجو من سلطانة – Sultana

كلمة آيس كريم وكنافة لوحدها كانت كفيلة أنها تسير فضولنا زي كتير من الناس بس كنافة ومانحو وأيس كريم، الكلام ده أكبر من أننا نحكي عنه، لأنه يتاكل فورًا.

كنافة بالآيس كريم والقشطة والكراميل من سلطانة – Sultana برضه

نعتقد أن الاختراع ده مناسب للأشخاص التقليديين كنافة وقشطة تركيبة أزلية ما يختلفش عليها أثنين الزيادة بس طعم الآيس كريم المنعش مع صوص الكراميل.

كنافة بالريد فليفت من ذا باتر هاف & كو – The batter half & co

طبقة كنافة ثم طبقة ريد فلفت بالكريمة تليها طبقة كنافة تانية، هتحتاج إيه أكثر من كده علشان تدخل عالم اختراعات ذا باتر هاف & كو واللي مقدم حاجات كتير مختلفة السنة دي.

كنافة دوم بالريد فلفت أو النوتيلا من ديوكس – Dukes

إحنا فعلًا وقفنا قدام الصورة عاوزين نعرف إيه ده؟! لحد ما اتصلنا بديكوس علشان نعرف أن تحت الطبقة الحمراء دي طبقات من الكنافة بالريد فلفت والكريمة، وأن في منها بالنوتيلا بالموز، وما حبناش نسأل أكثر من كده عن النوع الثالث اللي بالفاكهة علشان الدنيا صيام وحرام اللي بيحصل فينا ده.

كنافة بالتيراميسو من تورتينا – Tortina

عشاق التيراميسو يا ترى ممكن يغامروا أنهم يجربوا كنافة بالتيراميسو؟ إحنا شخصيًا متشوقين نعرف طعمها هيكون إزاي! ومتوقعين أن تورتينا هتطول رقبتنا كالعادة.

مستنين أرائكم في أختراعات الكنافة في رمضان السنة دي.

وكل سنة وأنتم طيبين.