The Definitive Guide to Living in the Capital , Cairo , Egypt

رمضان بدأ وبدأت معاه العزومات اللي طبعًا هتحتاج أنك تشتري ليها حلو قبل ما تروح، وعلشان كده وفرنا لكم بعض الأماكن اللي نزلت حلويات رمضان مميزة السنة دي، وخلينا نشوف الاختراعات للناس اللي بتحب تجرب، وإن كان الحاجات الكلاسيكية برضه بتكسب في الآخر. لاحظنا إن أغلب الأماكن بتعرض كنافة ببسكوت اللوتس، وهي دي تقليعة رمضان السنة دي.

لابوار – La Poire

 لابوار السنة دي خرجت بره الصندوق، وعملت لنا شوكولاتة بنكهات مختلفة زي الفستق، كنافة، أوريو، حلاوة طحينية، ماء الزهر. لكن كمان عملوا كنافة ببسكوت اللوتس والأوريو مع بعض! أحلى اختراع ده ولا إيه؟ حاجة لازم تجربوها.

نولا – Nola

كمان نولا السنة دي مستمرة في الاختراعات، وبتقدم لكم أحلى كنافة مع اللوتس والشكولاتة، ده غير أنواع تانية كتير من الكنافة والبسبوسة هتشوفوها في الفيديو ده!

تورتينا – Tortina

من الأماكن اللي بنستنى الجديد بتاعها على نار هي تورتينا، واللي بدأت تحمسنا بتشكيلة حلويات شرقية بجانب أصنافها المعتادة من الكنافة مانجو بالمارنج والكيك والكنافة نوتيلا والريد فيلفت وباقي الأنواع اللي معمولة بحرفية وحب.

ساليه سوكريه – sale sucre

كل سنة بيقدم منتجات بنفس الجودة سواء الكنافة بالنوتيلا أو بالمانجو أو الميكس اللي بيكون بين أكتر من نوع في طبق واحد.

ديلايت – Delight

السنة دي ديلايت بيدلعنا بكريم بروليه بالكنافة وأنواع تانية كتير من اللي قلبك يحبها مش هتقدر تقاومها.

ذا باتر هاف أند كو – The Batter Half & Co

متع نفسك بالكنافة النوتيلا والريد فيلفت وأنواع تانية كتير مستنياك في ذا باتر هاف أند كو.

ذا فور فات لايديز – The Four Fat Ladies

في فترة قليلة قدروا يقنعوا جمهورهم إنهم فعلًا بيعملوا أحسن كيك في مصر، بس هل يا ترى حلويات رمضان هتكون بنفس الجودة؟ بدأنا نشوف أول اختراع ليهم وهو الكنافة بالتمر اللذيذة ومستنيين الباقي.

سلطانة – Sultana

بعد إبداعات كتيير من سلطانة اللي بتقدم تورتة آيس كريم بالكنافة بجميع الأنواع، السنة دي هتقدم بسبوسة بالآيس كريم وبسكوت اللوتس اللي مسيطر على كل محلات القاهرة.