The Definitive Guide to Living in the Capital , Cairo , Egypt

لما تحب تجيب هدية مبتكرة وغير
تقليدية لأي حد أنت بـ تحبه أو لأي مناسبة خاصة ادخل شارع نادي الصيد هـ تلاقي في
وشك كافيه “ستارباكس – Starbucks”،
ادخل يمينه وخليك ماشي على طول هـ تلاقي في آخر الشارع على الشمال محل هدايا كبير اسمه
«بارتي بيرفكت – Party Perfect».

المحل مش جديد في المجال ولا
المنطقة، ده بقاله 15 سنة، وفي المكان اللي هما فيه دلوقت 9 شهور لأن مكان المحل
اتغير، الحكاية بدأت سنة 1994 لما أليسون وأشرف كانوا بـ يبحثوا عن مكان محترف يعملوا
فيه ديكورات ورسوم على بالونات الفرح بتاعهم، وانتهى بهم الأمر أنهم ما لقوش حد وعملوها
بنفسهم بعد ما أخذوا تدريب ملخص في إنجلترا وقرروا ينقلوا الفكرة دي لمصر ويبدأوا
مشروعهم الخاص، المشروع نجح جدًا مش بس من خلال انطباع الناس لديكور فرحهم لكن على
مستوى الشركات والأفراد اللي بـ يبحثوا عن طرق مبتكرة لإضفاء روح الاحتفال على
مناسباتهم. وبعدين في عام 1996 افتتحوا أول محل بـ يوفر بالونات وهدايا وكمان فيه
خدمة تقديم الهدايا بشكل مبتكر وعمل ديكور للمناسبات المختلفة وسموه «بارتي بيرفكت».

أول ما تدخل المحل هـ تلاقيه طويل
قوي من الداخل، فيه كاونتر في المنتصف بـ يخدمك الناس من خلاله وجواه أنبوبة
هيليوم كبيرة اللي بـ تنفخ البالونات، وحواليه من كل حتة على الجانبين أرفف بطول
المحل عليها الهدايا التقليدية اللي ممكن تلاقيها في أي محل هدايا وورق الهدايا
والصناديق وغيرها كثير، لكن الموضوع هناك مش كده وبس، عندهم هدايا أنت بـ تبتكرها
وهما بـ يساعدوك من خلال الطباعة على: تي شيرت، ورق البردي، السيراميك، كيس
المخدة، الشموع، الورد الطبيعي والصناعي، الكريستال، دبوس بادج، مج عادي وكمان
المج السحري (أو الحراري)، البالون، وأخيرًا على البازل.

طبعًا الأسعار اللي موجودة هناك
بـ تختلف من حيث الكمية المطلوبة والحجم أو المقاس، والمطبوعات عامة بأنواعها لازم
تقول عليها من قبلها بفترة لأن الطباعة بـ تأخذ وقت حد أقصى 4 أيام كل على حسب (يعني
ما ينفعش تطلبها يوم المناسبة)، أول حاجة الطباعة على التي شيرت (أنت اللي بـ
تجيبه) بـ 60 جنيه وهو مش بـ يوفر تي شيرتات علشان بـ يحصل مشاكل في موضوع المقاس
والخامة، فقبل ما تروح هات التي شيرت بتاعك السادة معاك، طباعة رسالة على ورق
البردي بـ 25 جنيه وحجمها زي حجم ورق الـ A4، السيراميك الطباعة عليه بـ 35 جنيه، كيس المخدة مقاس 35 x 40 سم بـ 80 جنيه والمخدة من
عندهم، الطباعة على الشموع بـ تبدأ من 25 لحد 100 جنيه على حسب الحجم، أما على
الورد الطبيعي الفريش بـ 15 جنيه والصناعي بـ 20 جنيه، على الكريستال بـ تتراوح
بين 35 لحد 100 جنيه، والدبوس البادج الواحدة بـ 15 جنيه لكن لو كمية هـ تقف عليك
الواحدة بـ 5 جنيه.

الجديد بقى موضوع المج الحراري
اللي بـ يكون لونه أسود ولما تصب فيه المشروب السخن بتاع صاحب الهدية بـ يتغير
لونه من الأسود للأبيض وبـ تظهر صورته أو التصميم اللي أنت طابعه عليه له وده هـ
يكلفك 90 جنيه وطباعته بـ تستغرق 4 أيام (له مقاس واحد فقط)، أما المج العادي
السادة فالطباعة عليه بـ 50 جنيه، نيجي أخيرًا للطباعة على البالونات اللي لها
نوعين: بالون هيليوم والثاني عادي، الهيليوم بـ يبدأ من 7 لحد 95 جنيه على حسب
الحجم، البالون الفويل من 22 لحد 100 جنيه، والمطاط من غير هيليوم بـ يتراوح من
1.50 لحد 55 جنيه.

والمختلف كمان عند “بارتي
بيرفكت” أنهم بـ يعملوا “بوكيه الحلويات – Candy Bouquet” اللي بـ يكون عبارة عن كولكشن
مختلفة للحلويات مجمعة ومعمولة على شكل بوكيه، وكمان عندهم طبعًا تغليف هدايا بـ
يبدأ من 5 جنيه على حسب الخامة والحجم.

أما بالنسبة لتصميم ديكور الحفلات
–الفكرة اللي قام عليها المحل- فسعرها بـ يتوقف على الكمية المطلوبة من كل عنصر،
وهناك مش هـ تغلب في الاختيار لأنهم عاملين حاجة حلوة جدًا علشان تختار البالونات
اللي أنت حاببها وهي استاندات متحركة زي المروحة معروض فيها نماذج البالونات إلى
جانب أنهم حاطينها في أدراج شفافة علشان تشوف ألوانها ونقشاتها، وكمان هـ تلاقي
للأطفال طراطير وماسكات عيد الميلاد، وفيه إكسسوارات بناتي لكن مش بكمية كبيرة،
إلى جانب طبعًا تشكيلة كبيرة من الهدايا التقليدية زي الدباديب والبراويز والأباجورات
والمنبهات وغيرها. إلى جانب طبعًا ورق وشنط وصناديق الهدايا بأنواع وألوان مختلفة
للتغليف.

“بارتي بيرفكت” مكان
مثالي لو أنت حابب تقدم هدية غير تقليدية ومن ابتكارك أنت لأنك ممكن تصمم الشكل
اللي أنت حابب تطبعه أو هما يعملوه لك وبالسعر اللي يناسبك.