The Definitive Guide to Living in the Capital , Cairo , Egypt

النيل ستوك هو محل لملابس
الأقطان الرخيصة زي بواقي التصدير، ودايما كنا نلاقى عنده الهدوم القطن الأساسية
الرخيصة قوي زي الملابس الرياضية، وزي ملابس البيت والنوم.

فرع النيل ستوك الجديد
موجود في نص شارع شهاب جنب حلواني «قويدر»، من أول ما تدخل المحل ماتحسش أبداً إنه
ده هو النيل ستوك اللي بـ يبيع هدوم رخيصة زي ما إحنا متعودين عليه من زمان. المحل
نضيف قوي من جوة ومُنَظَم زي المحلات الكبيرة اللي بـ تبيع هدوم بميات الجنيهات. البياعين
اللي في المحل ودودين جداً وبـ ييجوا يساعدوك من نفسهم لو حسوا إنك واقف محتاس أو
بـ تدور على حاجة معينة (بس برضه من غير ما يفضلوا واقفين فوق دماغك ويخنقوك). الحقيقة
إحنا مش عارفين الكلام ده حاصل عشان المحل لسّه فاتح جديد ولا ده هـ يفضل العادي
عندهم، بس الحاجة الأكيدة إنهم لو استمروا كده هـ يكسبوا زباين كتير قوي. الحاجة
الوحشة في المحل إنه كبير ومافيهوش غير پروﭬتين بس لقياس الهدوم، يعني لو المحل
زحمة شوية إنسى إنك تعرف تقيس أي حاجة.

بما إن نوعية الهدوم عندهم
تقريباً واحدة، فـ مش هـ تلاقي أقسام كتيرة هناك. أول ما تدخل من باب المحل هـ
تلاقي أرفف وشماعات عليها تيشيرتات شبه بعض (يا اما باللون أو بالنوع)، فيه بعد
كده ستاند للشرابات، والحاجة الغريبة اللي لاحظناها فيه هي إن كل الشرابات اللي
بصينا عليها كان سعرها موحد مهما كان نوعها أو سمكها أو طولها (19.98 جنيه). ومن
وسط الشرابات ديه لاقينا شراب عجبتنا فكرته جداً، وهو شراب طبي مخصوص لمرضى السكر.
الشراب تقيل عشان يدفي، لكن عاملينه قصير شوية عن العادي، والأستيك بتاعه خفيف قوي
ومعمول من خامة معينة مريحة جداً عشان مايبقاش ماسك على رجل مرضى السكر ويحبس الدم
فيها، وبرضه كان زيه زي باقي الشرابات من ناحية السعر (19.98 جنيه). وفي آخر المحل
خالص فيه قسم لملابس الأطفال من أول سن سنة واحدة وإنت طالع، بس أغلب أسعار ملابس
الأطفال مش رخيصة قوي، يعني بـ تبتدي من أول 50 جنيه.

بالنسبة لخامات الملابس،
فـ هي كويسة جداً وناعمة. لكن على عكس بعض المحلات التانية، التيشيرتات الرخيصة في
نايل ستوك كانت برضه خامتها حلوة جداً. الشيء الغريب قوي بقى كان تفاوت الأسعار في
الهدوم، يعني مثلاً التيشيرت السادة اللي بنص كم كان سعرها في حدود 30 جنيه، ولمّا
تِقَلِب في نفس الستاند تلاقي تيشيرت تانية سادة برضه بس بـ 160 جنيه. يمكن الفرق
الوحيد بينهم يبقى إن التيشيرت اللي بـ 160 جنيه دي قَصِتها تِدّي أكتر على (توب)
للخروج، على عكس التيشيرت التانية اللي تمشي أكتر للرياضة والنادي أو للمشاوير. عامةً
أسعار التيشيرتات كانت بـ تبدأ من 25 جنيه ولغاية 180 جنيه.

عجبنا هناك تيشيرت سادة
بكم طويل وبرقبة مقفولة سعرها 99 جنيه، وجنبها كان فيه أختها بالظبط بس برقبة
عالية (هاي كول) وكانت بـ 109 جنيه. أما بالنسبة للبنطلونات فـ عندهم تنوع جامد فيها،
يعني كان فيه بنطلونات للرياضة وبنطلونات رسمية للشغل وبنطلونات جينز وپرمودا،
وحتى شورتات البحر كمان. أسعار البنطلونات كانت من أول 50 جنيه لغاية 180 جنيه،
وبالنسبة للجيبات كان فيه مجموعة مش بطالة، وكان فيه تشكيلة جيبات رسمية في حدود
150 جنيه.

من ضمن الحاجات اللي
لاحظناها هناك كانت إن فيه ملابس كتير التيكيت بتاعها مكتوب عليه اسم محل «بنيتون»
وصنع في سوريا. بس اللذيذ إن الملابس بتاعة «بنيتون» ديه كانت أسعارها حلوة قوي،
عجبنا منهم قميص سادة بنص كم وكان سعره 78 جنيه.

لو جيت بعد كده تنزل تعمل شوية شوپنج إبقى عَدّي
على النيل ستوك، أكيد هـ تلاقي هناك حاجة ولا حاجتين لُقطة بأسعار رخيصة قوي.