The Definitive Guide to Living in the Capital , Cairo , Egypt

أي مصري غاوي مكسرات وتسالي يعرف أن أحسن الأصناف هي
اللي جايه فريش من مزارعها ولسه محمصة حالاً في المِقلة، وأحسن لب ممكن تجيبه من
محل «البحر الأبيض المتوسط» في مطروح، وأحسن مكسرات وياميش عمومًا من أسوان علشان
مناخها الصحراوي الحار.

وفي القاهرة سهل في كل شارع أنك تلاقي مِقلة بتصميمها
المميز بجبال اللب والسوداني والحمص وراء الزجاج في العرض وكلها بـ تحمل اسم «تسالي
كذا…» ومنورة بإضاءة قوية.

«الموفق» مختلف شوية وله كذا فرع في القاهرة، قدر يعرض
ويقدم الـ “تسالي” التقليدية بشكل جديد بعيد عن طريقة عرض المِقلات اللي
غير نظيفة أحيانًا. المحل محندق ومرتب وبكاونتر شيك والألوان خشبية جميلة وخدمة
الزبائن سلسة وسريعة. وبَدَل ما هـ تأخذ المكسرات ولا اللب في كيس أبيض أسطواني طويل
هـ تأخذ الحاجة مغلفة بإحكام وداخل شنطة قماش أنيقة عليها لوجو المحل.

أكيد عديت مرة من أمام «الموفق» خصوصًا أنه له أكشاك في
بعض فروع «مترو ماركت» و«كارفور» ومولات ثانية ونوادي رياضية في محافظات مصر المختلفة.
وشهرته الكبيرة اكتسبها من ياميش رمضان والخوخ المجفف والمشمشية والقراصية وتشكيلة
المكسرات اللي بـ يعرضها في الشهر الكريم.

كل حاجة موجودة، لب وفول سوداني وجوز ولوز وكاﭼو وفستق
وكل حاجة فيه منها مملح وسادة، ولو عاوز تجرب حاجة متطورة شوية من المكسرات جرب
السوداني بالفلفل الحلو (100 جرام بـ 5 جنيه) أو مكسرات بالليمون المشطشط. المحل
بـ يبيع مكسرات صينية مشكلة مملحة وبنكهات مختلفة، ولوز صيني وبندق بالوسابي وأي
نوع من المكسرات العجيبة اللي بـ تلاقيها بـ تُباع مغلفة في السوبر ماركت.

لو مدمن حلويات هـ تلاقي على الكاونتر شوكولاتة باللبن
وشوكولاتة بيضاء وشوكولاتة عادية بالكراميل وجوزهند واللوز ومن غير، الـ100 جرام
بـ12 جنيه.

لو بـ تحب النكهات القوية وعايز حاجة مميزة جرب المكسرات
بالقهوة التركي بالشوكولاتة (100 جرام بـ 12 جنيه) والحمص المِشكل الملون. الفول
السوداني بالكراميل لذيذ ومقرمش ( 4 جنيه ونص للـ 100 جرام) بس للأسف هي مش زي
الفولية المغطاة بالعسل والسمسم اللي بـ تلاقيها في محلات التسالي العادية. الكاﭼو
بالكراميل من أحلى الحاجات هناك (100 جرام بـ 12 جنيه) علشان طعمه حلو على حادق
على مقرمش، من أحسن الحاجات اللي تجيبها لو عندك حفلة تسالي في بيتك.

لو بـ تحاول تنزل وزنك انسى الموضوع ده مع «موفق»، المحل
كمان بـ يبيع فاكهة مجففة زي البابايا والموز والمشمش أسعارها 10 جنيه للـ 100
جرام.

الأسعار طبعًا غالية بالمقارنة بمحلات المكسرات الثانية،
يعني حبة تسالي صغيرين كده وتلاقي نفسك دافع 100 جنيه، فـ خلي بالك وأنت بـ تشتري
وإلا هـ تلاقي الفاتورة عالية بجد. بس غير كده المعروضات كلها فريش وممتازة
ومعروضة بشكل جميل. «الموفق» أحسن مكان تجيب منه حاجات “السبوع” للأطفال
وبرضه لو هـ تعمل قعدة تسالي محترمة في البيت.