الكحك لسه خارج من الفرن: 5 أماكن تجيب منهم كحك العيد
Dina Mokhtar
زمان في بيوت كثيرة في مصر كان النصف الثاني من رمضان له بهجة خاصة؛ الأمهات بتبدأ تحضر مكونات كحك العيد والذي منه، وتشوف لو ناقصها صينية ولا فورمة تنقش بيها الكحك، ولو فيه خباز جنب البيت تتفق معاه علشان تحجز مكان مثالي لصوانيها في الفرن عنده وهكذا. دلوقتي الموضوع اختلف كثير، الواحد ما بقاش لاقي وقت يحضر الفطار أصلًا، ما بين شغل وزحمة مواصلات وطريق واقف… وبعد الفطار الواحد ما بيصدق ياخد كوباية شاي في حضنه و"يلملم شتات نفسه بعد يوم آخر من الصيام".
فبدل الهم ده كله، الموضوع بقى أبسط كثير أنك تروح تشتري كحك جاهز. صحيح ما فيش كل المبهجات الطفولية الخاصة بعملية التحضير… بس خلينا واقعيين أن الجاهز مضمون نوعًا ما من حيث الطعم والجودة؛ لا تقول لي بقى "أصله اتلسع في الفرن" أو "أصل ما لاقيتش روح الكحك عند العطار". يالا المهم، إليكم موجزمدعم بالأسعار بأهم الأماكن اللي بتقدم الكحك:
من الأماكن المشهورة، واللي لها شعبية كثيرة عند المصريين، لدرجة أن في مواسم زي مولد النبي والعيد تلاقي طابور طويل واخد وسط البلد من أوله علشان الناس تجيب منه حلويات. بس الموضوع بقى أسهل كثير دلوقتي؛ لأنك هتلاقي أكشاك العبد في كل المولات، وحتى جوه الهايبر ماركتس.
ندخل على المهم وهو الأسعار، اللي جاي ده كله سعر الكيلو الواحد: الكحك السادة – الملبن – العجمية بـ 55 جنيه لكل نوع. أما عين الجمل والفستق، فالأول بـ 80 والثاني 90 جنيه.
أما الغريبة فسعرها 60 جنيه للكيلو، والبسكويت السادة – البرتقال – جوز الهند – الشوكولاتة بـ 45 جنيه للنوع الواحد. البتي فور فيه منه بـ 60 واللي بالمكسرات 80 جنيه. ناقص نقول لكم أن فيه مجموعة من العلب المشكّلة اللي أسعارها بتبدأ من 85 جنيه لحد 250 جنيه، ووزنها من أول كيلو ونص لحد 4 كيلو. وطبعًا الأنواع اللي جواها وعددها بيفرق في السعر.
أعرف أكثر عن العبد وحلوياته من هنا.
بالرغم من أن ساليه سوكريه مش من المحلات اللي بتعمل دعاية ضخمة لنفسها زي بقية الأماكن الثانية، إلا أن ده ما يمنعش أنه من الأماكن اللي لها قطاع عريض من المعجبين واللي ما بيجيبوش حلوياتهم إلا منه. وزي ما بيعمل حلويات رمضان اللذيذة؛ ساليه سوكريه عنده مجموعة متنوعة من كحك العيد والبسكويت.
الأسعار عنده بالعلبة، وهي كالآتي: علبة كحك سادة أو عجوة أو ملبن سعرها 68 جنيه لكل نوع، أما العجمية 75 جنيه والملبن بالجوز 95، الجوز لوحده 110 جنيه وكحك العجمية بالجوز 100 جنيه.
الغريبة بالفستق عنده بـ 85 جنيه، بسكويت النشادر 75 جنيه، أما أنواع البتي فور ففي عادي، لوكس ومكسرات وسعرهم بالترتيب 75 – 80 – 90 جنيه للعلبة الواحدة من كل نوع.
شوف الكلام ده كله بالتفصيل من هنا.
لابوار تميز بمجموعة الإكلير الجديدة اللي نزل بيها رمضان السنة دي. وعلشان كده ضمناه للقائمة الكحك. وعن تجربة؛ بسكويت الفانيللا والشوكولاتة هايلين.
الكحك السادة والعجوة بـ 85 جنيه للنوع الواحد، أما العجمية فبـ 90 جنيه، كيلو جوز بالملبن سعره 95 جنيه، أما الجوز بعين الجمل فسعره 135 جنيه. وعلى عكس أماكن ثانية مش بتقدم الكحك المحشي فستق لابوار بيقدمه بسعر 140 جنيه للكيلو.
أما الغريبة فسعرها 110 جنيه، بسكويت الفانيللا والشوكولاتة اللي كنا بنقول لك عليهم فوق بـ 100 جنيه للكيلو، وأخيرًا كيلو البتي فور بـ 120 جنيه.
لو عندك استفسار، تقدر تاخد فكرة من هنا.
تسيباس من الأماكن اللي بقالها كثير في السوق، واللي أجيال كبرت على حلوياتها في جميع المناسبات. بص يا سيدي، تسيباس نظامه مختلف عن معظم الأماكن الثانية اللي بتبيع بالكيلو؛ لأنه بيقدم علب مقسمة لـ باكيتات فيها منوعات من البسكويت والكحك والبتي فور والغريبة. وطبعًا سعر كل علبة بيختلف حسب حجمها، الأنواع اللي موجودة فيها وكمياتها.
يعني عندك أول حجم كيلو و200 جرام سعره 75 جنيه، فيه 16 قطعة من كل حاجة من الحاجات دي (كحك سادة – غريبة – بسكويت نشادر – بتي فور)، الأكبر 2 كيلو و200 جرام فيه أكثر من نوع من الكحك بعدد قطع متفاوتة، نوعين من البسكويت (نشادر وجوز هند) وغريبة وبتي فور – ده على سبيل المثال.
ولأن تفاصيل كل علبة كثيرة على أننا نكتبها هنا؛ ممكن تدخل على صفحة الفيسبوك الخاصة بيهم واختار اللي يناسبك منهم (اقرأ الكومنتس هتلاقيهم رادين على استفسار بالتفصيل الممل). لأن لسه فيه ثلاثة أحجام أكبر من اللي كاتبين عنهم، وهم 4 كيلو (320 جنيه)، 5 كيلو (410 جنيه) وأكبر حجم –ده رقم عمرنا ما نتخيل أن ممكن حد يجيبه إلا لو هيأكل فرح بحاله- 8 كيلو ونص برقم خرافي ثاني وهو 650 جنيه – ماله الساده، ها؟
منتجات ماندرين قويدر بتتميز بجودة مكوناتها وثبات مستواها، ونعتقد أنه من الأماكن الناجحة جدًا سواء في الحلويات الشرقية أو الآيس كريم، ومعاهم الكافيه الموجود في قطامية داون تاون مول في القاهرة الجديدة.
عن تجربة، كحك ماندرين مختلف عن أي كحك هتدوقه في حتة ثانية وأسعاره كالآتي: السادة بـ 67 جنيه، العجوة أو الملبن بـ65 جنيه. أما المحشي مكسرات فاللي بالفستق بـ 140 جنيه واللي بعين الجمل بـ 120 جنيه.
تقدر تشوف منتجات العيد بتاعتهم من هنا.
وفي النهاية نصيحة أخيرة: مش معنى أن الدنيا ما بقيتش صيام وعيد وكده أنك تفتري في أكل الكحك.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
