The Definitive Guide to Living in the Capital , Cairo , Egypt

المحل ده من نوع أصبح نادر شوية من المحلات، بـ يبيع حاجات مهمة ومالهاش علاقة ببعض، بعضها من أساسيات كل بيت وبعضها كماليات وإكسسوارات، شبه محلات الخردوات اللي كانت منتشرة زمان في كل حتة، وانحسرت مؤخرًا بشكل كبير. لكن محل «العدوي» بـ يصنف نفسه على أنه متخصص في تجارة وتوكيلات الأجهزة الكهربائية، وكاتب كده على كل لافتات المحل والشنط البلاستيك اللي بـ يعطيها للزبائن. وقفتنا أمام فاترينة العدوي فعلًا زغللت عيوننا من تنوع المعروضات وإحساسنا أننا مش هـ نلاقي نفس البضائع دي بسهولة في مكان واحد. يعني ممكن وأنت واقف هنا تفتكر على الأقل 4 أو 5 حاجات أنت محتاجها لبيتك أو للاستخدام الشخصي ومش بـ تعرف تجيبها منين.

أمثلة للمعروضات هنا: سماعات منزلية وكاسيت وراديو وكشافات وتليفونات أرضية وبعض موديلات المحمول وإكسسوارتها ومكواة وساعات حائط وساعات يدوية ومنبهات ومكانس أفران وميكرويف وماكينات حلاقة للرجال وللسيدات وسيشوار، وفيه نظارات معظمة وعدسات مكبرة ولوازم تدخين زي البايب والفلاتر والولاعات، وكل أنواع البطاريات الجافة وشواحن لكل الأغراض وإكسسوارات كمبيوتر. هـ نعطيكم فكرة عن الأسعار حالًا.

هنا ماركات المنتجات مش معروفة خالص، كلها حاجات مستوردة من الصين ومحطوط عليها أسماء موديلات مش مشهورة، من الآخر هنا المنتجات الشعبية اللي ممكن تلاقيها في وسط البلد بدون أي ضمانات، لكن في المقابل الأسعار أقل بكثير وتقدر ترجع للمحل في أي وقت في حالة حدوث مشكلة في الحاجة اللي اشترتها، ودي ميزة أنك تشتري من محل معتز بنفسه وباسمه وعامل كروت دعاية وحاطط أرقام تليفونات.

الراديو بتاع زمان اللي بـ مؤشر مش بشاشة ديجيتال موجود هنا بأحجام مختلفة بأسعار 25 و50 و70 جنيه وفيه منه بسماعات كبيرة ومشغل mp3 بسعر 244 جنيه، والراديو الديجيتال العادي بساعة ومنبه بـ 95 جنيه. كشافات بأحجام مختلفة حسب عدد اللمبات اللي فيها، بـ تشحن بالكهرباء وأصبح لا غنى عنها في أي بيت اليومين دول مع زيادة فترات انقطاع الكهرباء، أسعارها من أول 20 جنيه لحد 100 جنيه، واسأل موظف المحل عن أحسن طريقة لشحنها وتفريغها علشان تطول عمرها قدر الإمكان.

ساعات الحائط أشكالها مش تحفة، موديلات قديمة وكئيبة شوية ما ننصحكش بها لو بـ تدور على حاجة تنفع ديكور، وأسعارها من 35 جنيه لحد 80 جنيه، يمكن المنبهات وساعات المكتب أشكالها جذابة شوية وأسعارها من 25 جنيه لحد 50 جنيه.

مش عارفين حسبتنا دي هـ تبقى دقيقة ولا لأ، بس تقريبًا أي قطعة هـ تلاقيها هنا مش هـ تلاقيها بـ تعدي الـ 200 جنيه إلا فيما ندر، يعني ممكن تدخل المحل الصغير بقلب جامد وأنت في جيبك جنيهات معدودة وتشتري شوية حاجات ضرورية جدًا لبيتك أو لك أو حتى هدايا وأنت ضامن أنك مش هـ تصرف كثير، وموظف البيع سريع ومحترف، هـ يفرجك على كل اللي أنت عاوزه ويجرب لك الأجهزة أمامك ويعطيك فكرة عن طرق التشغيل والتعامل، ودي ميزة مهمة في المكان بـ تخلينا مبسوطين من تجربتنا في «العدوي». القي نظرة على المحل لو كنت من المترددين على ميدان الجيزة.