The Definitive Guide to Living in the Capital , Cairo , Egypt

خبر أن فيه "نونو" جاي في السكة كفيل يقلب حال أي أسرة رأسًا على عقب، تحضيرات كثير جدًا جدًا وسعادة شديدة واستعداد أن الواحد يروح المريخ علشان يجيب له حاجة حلوة ما تؤذيش جلده الرقيق، فكرة "الاسترخاص" أو البحث عن "أوكازيونات" بـ تبقى مرفوضة، الأب والأم الجداد بـ يبقى عندهم استعداد يدفعوا آخر مليم في محفظتهم علشان يجيبوا حاجة مميزة للنونو اللي هـ يشوف الدنيا لأول مرة معاهم.

محلات كثيرة بـ تستغل النقطة دي، وبـ تقدم منتجات مستوردة بأسعار فلكية، شوفنا كثير منها واتخضينا فعلاً من أسعار غير منطقية بالمرة، يعني مثلاً إزاي "بافتة" ثمنها 120 جنيه! ده حقيقي شوفناه في أحد محلات الماركات الشهيرة، المهم ما نطولش عليكم، فيه ماركة سمعنا عنها كثير جدًا أنها من القطن المصري الخالص، وأنها معمولة بس للتصدير اسمها "الصياد"، بعض المحلات بـ تبيعها بأسعار مضاعفة على اعتبارها حاجة نادرة، وناس كثير بـ تقعد تسأل نجيبها إزاي ومنين.

بحث صغير على الإنترنت عن "محلات الصياد لملابس الأطفال" وهـ تشوف أساطير بين الناس عن الجودة والقطن الطري، والمكان السخيف اللي مش كثير بـ يعرفوا يوصلوا له، دورنا كثير وعرفنا أن ماركة الصياد هي مصنع من مصانع الدولة، متخصص في تصدير ملابس الأطفال للخارج، لهم 3منافذ بيع فقط، واحد في القاهرة وواحد في الإسكندرية وواحد فى الشرقية.

اللي في القاهرة في مساكن شيراتون ودي لكثير من سكان وسط القاهرة مكان صعب وبعيد ومواصلاته مش واضحة، المهم ما نطولش عليكم، رحنا هناك واكتشفنا أن المنتجات فعلاً حلوة جدًا، وجودتها عالية، والأجمل الناس اللي بـ تبيع وبـ تقدم المنتجات دي لناس أول مرة تتعامل في مسألة ملابس النونو، نصائح كثير عن المقاسات وعدد القطع المناسبة، وكلها أمينة بدون مبالغة أو تهويل.

الأسعار هناك مش رخيصة وكمان مش غالية، نقدر نقول أنها مكان معقول جدًا للناس اللي عاوزة جودة وسعر مناسب، طبعًا كله من القطن الطبيعي، وكل حاجة موجودة من الإبرة للصاروخ، المكان عبارة عن دورين كلهم محلات لماركة الصياد، دخلناهم، ودخلنا تحديدًا على الجزء الخاص بالمواليد، طبعًا فيه ملابس للأطفال هناك كل الأعمار لحد 5 و6 سنين.

إحنا ركزنا على الجزء الخاص بحديثي الولادة وحبينا نقول لكم الأسعار ونصيحة البياعة بعدد القطع اللي ممكن أم وأب بـ يجيبوا هدوم لطفلهم أول مرة يجيبوها.

طبعًا أول حاجة بـ نتكلم فيها هي الفانلات اللي بأكمام، ودي لزوم الشتاء، أسعارهم حوالي 16 جنيه، بعدين بقى "الشاية" اللي بنصف كم والكت، ودي "فانلة" لكن لها كباسين، ولها رسمة مختلفة عن الفانلة العادية، بـ تتميز عن الفانلة أن طريقة لبسها أسهل كثير من الفانلات اللي غالبًا بـ تضايق البيبي بسبب ضيق المنطقة اللي عند الرأس، كمان الشايات بـ تحتوي البيبي أكثر، سعرها عندهم 19 جنيه، طبعًا ماننساش البُرنس، إشمعنى الكبار يعني يكون لهم بُرنس خاص؟ النونو كمان من حقه بُرنس على قده(45 جنيه) بألوان مختلفة وخامات لطيفة جدًا، نيجي بقى لبقية التفاصيل.

من حق البيبي بنطلون له جيوب زي أي إنسان طبيعي، عند الصياد شماعة فيها بنطلونين، ملونين وفيهم نقشة ظريفة وبجيوب الاثنين(48 جنيه)، أما بقى السالوبيتات فالقطن اللي بكم ورجلين طويلة سعر الاثنين في شماعة واحدة بـ 85جنيه، ودول فيهم نقشة لكن لونهم أبيض، أما الملونين الاثنين في شماعة واحدة بـ 92 جنيه.

السالوبيتات بـ تتراوح مقاساتها حسب العمر، فيه سالوبيتات لأول شهر فقط، ودول البياعة مش بـ تنصح بالإكثار منهم اثنين كفاية، وفيه سالوبيتات من لحظة الولادة لسن ثلاث شهور ودول برضه آخرهم ستة كفاية، وفي من عمر 3 شهور لـ 6 شهور، وفيهسالوبيتات  من 3 لـ 9 شهور، وأحيانًا لو البيبي مليان شوية ممكن يلبس السلوبيتات دي بدري، ودول كمان بـ نجيب منهم ثلاثة احتياطي، فيه بقى سالوبيتات خروج ملونة من سن الولادة لثلاث شهور، الثلاثة منهم في باكيت واحد بـ 128 جنيه.

صحيح مافيش ألوان كثيرة أوي ولا رسوم كثيرة ممكن نختار بينهم، لكن الموجود ظريف وشيك، اللي فيه فعلاً اختيارات متعددة جدًا هـ تخليكم تقفوا أمامها كثير أوي هي البافيتات، أسعارهم من 10 لـ 20 جنيه، لكن خلينا نقول أنها رائعة.

طبعًا ما ننساش بطانية البيبي علشان الخروج بالليل، ودي بـ يبيعوها فرو ولها ألوان كثير، سعرها 111 جنيه، كمان عندهم أنواع كوفرتات مختلفة، عجبتنا كوفرتة كابيتونيه(82 جنيه)، المميز كمان عندهم شرابات مضادة للبكتيريا سعر الثلاثة منهم 20 جنيه.

خلينا نقول أن الصياد بـ يهتم بـ كل تفصيلة ممكنة، حتى غطاء الأيد "جوانتي البيبي" هـ تلاقوه عندهم وده علشان البيبي ما يخربش وشه، سعر  الجوانتي 8 جنيه بألوان لطيفة.