The Definitive Guide to Living in the Capital , Cairo , Egypt

محل جديد لفت نظرنا في مصر الجديدة، وبالتحديد في شارع النزهة قريب من أرض الجولف، هو محل «إيجل – Eagle» للملابس الرجالي الكاجوال والكلاسيك، ويمكن الكلاسيك أكثر شوية، من بعيد وأنت معدي أمامه مش هـ تشوف غير البدل الكاملة والسموكن والبليزرات، لما تدخل جوه هـ تلاقي مجموعة من الجينز والبول أوڤر والقمصان الكاروهات الشتوية. لكن التركيز الأكبر هنا وحتى البضاعة الجديدة اللي كان العمال في المحل منهمكين في رصها وتوزيعها على الأرفف وقت زيارتنا كانت كلها كلاسيك، وفيه مجموعة كبيرة من الإكسسوارات زي المحافظ والأحزمة الجلدية والكوفلينكس (أزرار القميص) وفيه عدد كبير من الأحذية الكلاسيكية، ومجموعة صغيرة من الأحذية الكاجوال والشامواه والموكاسان اللي شبه السبدرين.

المحل مساحته مش كبيرة لكن المعروضات متنوعة وكثيرة بدرجة ملفتة، هـ تلاقي كل حاجة تقريبًا وكل الأذواق، والظريف أن الأسعار هنا قليلة بجد، يعني صف السويترات الجلد الموجود في منتصف المحل أسعاره من 300 لـ 400 جنيه، وقصته ظريفة (slim cut) وألوانه حلوة فيه منه البني والأسود والرصاصي، بس المشكلة أن أكبر مقاس في السويتر هنا اللي هو XXL في مقام اللارج العادي في أي محل ثاني، والتقفيل مش ممتاز لكن معقول بالنسبة للسعر.

علامة «إيجل» التجارية موجودة على موديلات كثير من البليزرات والأحذية والجينز، لكن في الوقت نفسه المعروضات كلها مستوردة، من الصين وتركيا وغيره، لكن علامة إيجل اللي حاطينها بـ تبقى للتمييز مش أكثر.

البليزر بأسعار من 350 لحد 500 جنيه وفيه مجموعة كانت بـ 900 جنيه وعليها خصومات 50 % لأنها من موديلات السنة اللي فاتت، قصتها كلها ومصنوعة من الصوف والكتان والقطن العادي، موديلاتها كاجوال بزيادة أو كلاسيك تقليدي، أذواق كثيرة موجودة هنا وألوان عجيبة زي النحاسي والأخضر، بس برضه مشكلة المقاسات موجودة وهـ تتعب على ما تلاقي المقاس لأنهم بـ يدوروا في المخازن واللي أنت فاكر أنه لارج بـ يطلع هنا medium فلازم تطلب أكبر من مقاسك بدرجتين ولا حاجة.

الجينز بأسعار من 200 لـ 350 جنيه، وما ننصحش به خالص هنا لأن موديلاته عتيقة وقصاته وألوانه وواضح أنه جايبه المحل من باب أنه يبقى عنده كل حاجة وخلاص، لكن البدل الكلاسيك كانت خطيرة وتستاهل أنك تقضي كل وقتك داخل المحل بـ تتفرج عليها وبـ تقيس في موديلاتها المختلفة، وأسعارها من 1100 جنيه لحد 1600 جنيه، والأحذية بـ 350 لحد 500 جنيه وعجبنا جدًا بعض الموديلات الكلاسيك بلمعة وتصميم جذاب مش شبه الموجودة في أي مكان ثاني، والكوفلينكس بـ 100 جنيه والأحزمة والمحافظ الجلدية في نفس الحدود، وبالمناسبة هنا هـ تلاقي نوع معين من المحافظ مش بـ نلاقيه في أي حتة وهي المحفظة الكلاسيكية المعمولة مخصوص للبدلة، بـ تبقى طويلة كدة وفيها خانات كثير للكروت، وفيه طبعًا كرافتات وبابيون وشرابات وكل ما يلزم الملابس الرسمية للرجال.

عجبنا محل «إيجل» وعجبنا أنه مش مبالغ في أسعاره، وعجبنا أن العاملين سايبينك تتفرج براحتك ومش بـ يقربوا إلا لو أنت سألت على حاجة.