ألعاب “إنيجما”.. لما تكون شيرلوك هولمز في نفسك!
ألعاب إنيجما ألعاب ذكاء ألعاب قضايا جنائية شيرلوك هولمز
Mohamed Talaat
القاهرة مليانة مبدعين بيخلوا تفاصيل الحياة في العاصمة أجمل! حتى لو في مجال الألعاب، يعني مثلًا اكتشفنا مؤخرًا كيان في دهاليز القاهرة بيعمل ألعاب ذكية جدًا، بتتحول فيها لمحقق أجمد من شيرلوك هولمز بذات نفسه! بنتكلم هنا عن “إنيجما”، اللي نقدر نقول عليها إنها مشروع إبداعي بيوفر لعبة عبارة عن ملف جريمة كامل بيوصلك، والمفروض إنك هنا محقق بتعرف من الحاجات اللي جوة الملف ده شخصية الجاني.
الملف اللي بيوصلك هتلاقي فيه كل اللي أنت محتاجه علشان تحل قضية وتوصل لقاتل، بداية من تقارير الطب الشرعي، ومرورًا بصور من مسرح الجريمة، ورسائل الضحية الخاصة، وشهادات الشهود، وأكتر. يعني الملف بيوفر لك كل الأدلة اللي هتساعدك على حل الجريمة.
“إنيجما” هي شركة مصرية بتوفر ألعاب جرائم وألغاز. اللعبة بتوصل لك في ظرف خاص –أشبه بالأظرف الحكومية بجد- فيه ملف القضية وبتحلل بنفسك التقارير والمحاضر والصور والمتعلقات الشخصية علشان تحاول توصل للقاتل، ومع اللعبة بيوصلك ظرف فيه اعتراف القاتل وطريقة القتل وسبب الجريمة.
اللعبة بديل حقيقي للموبايل وتعلقنا المرضي بيه، وهي كمان وسيلة جميلة لتجميع أفراد الأسرة، يعني هتقدر تجمع أصحابك وأفراد عائلتك وتحولهم كلهم لمحققين ممكن تطلب منهم المساعدة في حل الجريمة، وطبعًا ممكن تحلها لوحدك.
“إنيجما” بتوفر أكتر من قضية علشان تحلها، وهم:
– قضية آية الصاوي.
– قضية جزيرة زهرة.
– قضية قاتل الفرو الأبيض.
تقدروا تتعرفوا على “إنيجما” أكتر وتشوفوا منتجاتهم وتطلبوها من خلال صفحتهم على فيسبوك من هنا.
