“أكادُ من فرط الجمال أذوب”.. أفضل 5 أماكن بتعمل بسبوسة في القاهرة
الحلمية بسبوسة بيستاشيو عبد الرحيم قويدر كنافة حبيبة لابوار
Mohamed Talaat
البسبوسة من الحلويات اللي تتحب من أول نظرة، وصعب مخلوق “عاقل” يقاومها، جميلة وخفيفة ومبهجة. لو مزنوقين في حلو أول حاجة لازم تفكروا فيها هي البسبوسة، وهي من سلالة الحلويات الشرقية “شامي – مصري”، وكل بلد ليها طريقة تحضير ليها بطريقة مختلفة ولكن يبقى الطعم هو الأساس، ورغم انتشار البسبوسة بالقشطة وجوز الهند والشيكولاته والمكسرات والزبادي وغيرها كتير، إلا أن البسبوسة السادة هي الأصل ومافيش جدال عليها.
في السطور الجاية هنقول لكم على أفضل 5 أماكن ممكن تشتروا منها بسبوسة سادة، وماتنسوش مع كل قطمة تفتكرونا!
الحلمية
صوت غنائي في الخلفية يدندن “أكاد من فرط الجمال أذوب”، وأنتم بتقطموا قطعة البسبوسة اللي بتدوب وهي بتتاكل وتحس إنها بترقص من كتر الجمال، هو ده أقل وصف لبسبوسة الحلمية، اللي هي من وجهة نظرنا أفضل بسبوسة في مصر دوقناها، وسعر الكيلو السادة 80 جنيه بس.
تقدروا تعرفوا أكتر عنهم من خلال صفحة الفيسبوك من هنا.
بيستاشيو
رغم أن شغلهم أونلاين بس، والتوصيل عندهم بياخد وقت، إلا إننا حبينا البسبوسة من عندهم، لأن الأوردر بيتعمل طازة أول بأول وبيجيلك مخصوص، وهتحسوا بطعم البيوت في البسبوسة وطبعًا تقدروا تختاروها سادة أو بأطعمة مختلفة والأسعار بتبدأ عندهم من 130 جنيه.
تقدروا تعرفوا أكتر عنهم من خلال صفحة الفيسبوك من هنا.
عبد الرحيم قويدر
لأصحاب المزاج الراقي في الحلويات الشرقية القديمة الأصيلة، لازم تجربوا عبد الرحيم قويدر واللي أشهر حاجة عنده البسبوسة ولكن للأسف مش سادة، لكن ده مايمنعش أن البسبوسة عنده تأشيرة سفر للانبساط، وسعر البسبوسة السادة 135 جنيه.
تقدروا تعرفوا أكتر عنهم من خلال صفحة الفيسبوك من هنا.
لابوار
صندوق الدنيا بيلعب وبيعمل موسيقى الضوء الشارد، معاها شاي بحليب وبسبوسة من لابوار، لأن البسبوسة تنفع مع أي مشروب وبعد أي أكل، ومن لابوار بلاش تشتروا البسبوسة الجاهزة، خليكم في اللي في العرض بتتقطع قدامكم، واللي جرب الاتنين هيعرف الفرق، وسعر طبق البسبوسة 140 جنيه.
تقدروا تعرفوا أكتر عنهم من خلال صفحة الفيسبوك من هنا.
حبيبة الكويت
حاليًا حلواني حبيبة الشهير في الكويت موجود في مصر، وطبعًا شهرته في مصر اتبنت على الكنافة النابلسية، لكن زي ما قلنا في أول المقال أن فيه طريقتين لعمل البسبوسة “شامي – مصري”، وكنافة حبيبة الكويت بيعمل بسبوسة على الطريقة الشامية ويعتبر أشهر حد بيعملها وان لم يكن الأوحد وسعر الطبق 70 جنيه.
تقدروا تعرفوا أكتر عنهم من خلال صفحة الفيسبوك من هنا.
مقترح
الحياة في كايرو
3 أماكن في القاهرة لتعلم فنون الطهي.. طلع الشيف المحترف اللي جواك
ازاي تبقى شيف محترف اماكن تعليم الطبخ في القاهرة +4
فن وثقافة
