The Definitive Guide to Living in the Capital , Cairo , Egypt

الصورة الرئيسية: Terry Jaskiw

الاستعداد لعودة الدراسة بدأ، وزي ما بيقولوا المصريين “والله بعودة”، وطبعًا الاستعداد المبكر لعودة المدارس من أهم الخطوات اللي هتسهل حياتكم مع بداية الدراسة، وعلشان كده المصريين في الأيام دي مهتمين بالبحث عن أفضل الأسواق في القاهرة لشراء مستلزمات المدارس، وبما أن الفترة دي الأسعار بقت غالية فهنقول لكم على 5 أماكن لبيع مستلزمات المدارس بالقاهرة بأسعار معقولة.

 

كلنا واحد

الحكومة السنة دي عاملة مبادرة “كلنا واحد” واللي بتتضمن 2286 منفذ لبيع مستلزمات المدارس بالتعاون مع الهيئات والتجار، والمنافذ دي منتشرة حاليًا في أماكن كتير في القاهرة، ومتوفر فيها كل المستلزمات والأدوات  المدرسية بأسعار مخفضة.

الفجالة

أهم منطقة في القاهرة هتلاقوا فيها مستلزمات المدارس سواء الكتب الخارجية المعتمدة أو الكشاكيل ومستلزمات الدراسة وكمان شنط وأدوات مكتبية تناسب كل الأعمار والفئات، وعندهم أسعار الجملة والقطاعي متقاربة وهي فعلًا أفضل مكان في القاهرة تشتروا منهم كل المستلزمات المدرسية اللي محتاجينها بسعر كويس جدًا.

حارة الصنادقية

لو عاوزين شنط للمدارس وتختاروا من وسط مئات الأنواع يبقى لازم تزوروا حارة الصنادقية، واللي بتوفر كل اللي تحتاجوه من شنط المدارس وبعض الأدوات المدرسية بأسعار مخفضة عن المحلات العادية.

العتبة والموسكي

يونيفورم أغلب المدارس في القاهرة موجود بأسعار أفضل من المدارس في العتبة والموسكي، وبعيدًا عن الزحمة والدوشة إلا أن المنطقتين بيوفروا مجموعة من الملابس والأحذية بجودة مختلفة حسب الحاجة وبأسعار مناسبة للجميع.

سور الأزبكية

في سور الأزبكية “عاصمة الكتب” هتلاقوا مجموعة متنوعة من الكتب المدرسية لكل المدارس الحكومية والدولية والخاصة، وكمان هتلاقوا كتب مدرسية بسعر رخيص، ده غير الأدوات المكتبية ومستلزمات الأنشطة اللي أسعارها في المتناول.