The Definitive Guide to Living in the Capital , Cairo , Egypt

لأن الشعب المصري بـ يحب التسالي زي اللب والسوداني… إلخ، طبيعي جدًا أنك تلاقي تقريبًا في كل حي من أحياء القاهرة محل أو اثنين بـ يبيعوا محمصات بأنواعها المختلفة. ولكن مش كل أنواع المكسرات هـ تلاقيها في أي مكان، زي المكاديميا والبيكان مثلًا، ده غير أن مش في كل وقت في السنة هـ تلاقي الأنواع المعتادة من المكسرات زي اللوز والبندق مثلًا بـ يتباعوا خام بدون تحميص في محلات التسالي العادية. وعلشان كده نقدر نقول أن أبو عوف – Abu Auf في الزمالك ما يعتبرش محل محمصات بس، ده محل أكل جورميه بمجموعة المنتجات الكثيرة اللي بـ يقدمها جانب المحمصات المعتادة.

أول حاجة لاحظناها أول ما دخلنا المحل أن المكان ضيق جدًا على كم المعروضات الرهيب، لدرجة أننا ما بقيناش عارفين نبدأ منين. على يمين وشمال المدخل مجموعة أرفف عليها منتجات مغذية من ماركة Nature’s Selection، زي علب كوكيز بقطع الشوكولاتة، جنين القمح، ودقيق القمح الكامل (50 جنيه)، بالإضافة لمجموعة من برطمانات عسل النحل، ودبس البلح. والمعروف أن كل المنتجات دي من الطبيعة ومش داخلها أي مواد صناعية، وبالتالي فيها كم كبير من الفوائد الغذائية.

قبل ما نبدأ نأخذ راحتنا في المحل علشان نتفرج بمزاج كانت القائمة على الخدمة تدخلت وسألتنا لو كنا بـ ندور على حاجة معينة. لما وضحنا أننا بـ نأخذ فكرة مبدأية قبل الشراء سكتت، ولكن ما أعطتناش براحنا في الفرجة بمزاج؛ أولًا، لأنها تقريبًا كانت سدة أي منفذ للحركة وخصوصًا أن مساحة الحركة وسط المعروضات ضيقة جدًا لشخص واحد، ما بالك اثنين. ثانيًا –وده الأغرب- أننا كنا تحت نظرها بطريقة مقتحمة وغير مريحة بالمرة… كل ما نرفع عنينا نلاقيها باصة لنا!!

المهم على اليمين، ثلاجة عرض المحمصات بأنواعها المختلفة، وكل نوع من المكسرات ليه أكثر من نكهة. تقدر تذوق أي نوع من الأنواع قبل ما تقرر، وتشتري من أول 100 جرام. بما أننا مش بـ نقابل البيكان كثير (290 جنيه الكيلو)، جربنا منه المملح، والمحمص بالزيت؛ الأول كان ملحه عالي جدًا، لدرجة أنك بعد ثلاث أو أربع حبات تحس أنك محتاج محيط يروي عطشك، أما المحمص بالزيت فكان العكس تمامًا، ملحه خفيف جدًا، ولكن الحبة نفسها ما كانتش طازجة زي الأولى.

على الشمال ثلاجة المكسرات غير المحمصة والفواكة المجففة، ودول ممكن يستخدموا في الطهي. لاقينا المكسرات اللي عادة بـ تستخدم في الطهي زي الفستق، البيكان، اللوز والصنوبر. أما مجموعة الفواكة المجففة، فموجود الفواكة المعتاد وجودها في ياميش رمضان، زي البرقوق، الخوخ والزبيب، وأنواع ثانية مش دائمًا بـ نلاقيها في كل مكان زي التوت بأنواعه، جربنا منها التوت البري الأحمر (240 جنيه للكيلو)، توقعنا أنه يكون مسكر أكثر من كده، ولكن نعترف بأنه طازج جدًا وما قدرناش نسيبه إلا لما خلصناه!

من ضمن المعروضات مجموعة من الحلويات الشرقية، زي النوجات والملبن، واللي موجود منها علب أحجام مختلفة، وممكن كمان تشتري بالجرام منهم (170 جنيه). جربنا منهم الملبن بالفستق، ونوع ثاني بالسمسم؛ الملبن سكره كان طعمه مضبوط جدًا، وسهل المضغ ومتماسك، أما المكسرات الموجودة سواء السمسم أو الفستق فكانت كميتهم ممتازة وحباتهم فريش.

من النوجات، جربنا النوجات بالفستق، ونوع ثاني بالحبهان واللوز، الأول كان مثالي وخصوصًا أن النوجات ناعمة جدًا وطعمها متوازن. ولكن النوع الثاني بغرابة مكون الحبهان فيه لفت نظرنا جدًا بحضور نكهته القوية واللي طغت على طعم اللوز اللي حباته كانت قليلة نوعًا ما، ولكن نعترف أنه عجبنا.

جربنا أحجار الشوكولاتة الملونة – Chocolate Stones (60 جنيه الكيلو)، واللي بـ تتميز بشكلها ولونها الشبيه بالأحجار الملونة اللي بـ نلاقيها على الشاطيء؛ توقعنا أن الشوكولاتة تبقى جودتها غير جيدة –كعادة أي حاجة شكلها مبهر بفكرتها المجنونة- إلا أن طعم الشوكولاتة كان رائع وسكرها متوازن جدًا مع الطبقة المسكرة اللي مغطياها، واللي في الوقت نفسه بـ تعطيها شكل ولون الأحجار.

بالإضافة لكل اللي إحنا قلناه، أبو عوف بـ يقدم مجموعة من المنتجات الثانية بـ تباع بالعلبة زي المقرمشات الصينية بنكهات مختلفة (10 جنيه) وأصابع الويفر بالشوكولاتة (15 جنيه)، غير كمان مجموعة كبيرة من البسكويت والمخبوزات المعلبة من أبو عوف، زيوت للطهي مستوردة وعلب بلح حجمها كبير (40 جنيه). كان نفسنا نشتري قهوة، وخصوصًا أن أبو عوف مشهور بأنواعه وتحويجاته المختلفة والمميزة، إلا أن القائمة على الخدمة وضحت لنا أن القهوة مش متوفرة في الفرع ده في الوقت الحالي.

أبو عوف من الأماكن اللي ممكن فعلًا تلاقي فيها كل ما هو متعلق بالأكل الصحي والمختلف في الوقت نفسه، في أي وقت في السنة بجودة وأسعار مناسبة.