The Definitive Guide to Living in the Capital , Cairo , Egypt

بجانب
القيمة الغذائية والسعرات اللي فيها، فيه ناس مدمنين مكسرات بـ يقعدوا يقزقزوها أمام
التليفزيون بالليل. محلات المكسرات موجودة بوفرة في شوارع القاهرة لكن نادرًا لما
بـ نلاقي محل معتني جدًا بالجودة وبالتنوع الكبير في المعروضات. اتكعبلنا بالصدفة
في فرع «أبو عوف
-Abu
Auf» الجديد اللي فتح في
سيتي ستارز أمام «سبينيز – Spinney’s» الموجود في المرحلة الأولى في الدور الأول.

المحل
مش متخصص فقط في المكسرات والتسالي، لكن فيه كمان أي حاجة ممكن تأكلها كتصبيرة خفيفة
بين الوجبات. بسكويت ونوجا وقطع قمر الدين لفرد واحد. ديكور المحل مليان ألوان
ومبهج والعاملين هناك متعاونين جدًا.

الجودة
لها ثمن طبعًا، يعني كيلو الكاجو الخام اللي بـ يستخدم في الطبخ أو على السلاطة بـ
110 جنيه، وهـ يبقى بـ 135 جنيه لو كان مملح ومحمص. الحقيقة أنه يستاهل كل جنيه
دفعناه فيه، مقرمش وفِضِل فريش لأطول فترة ممكنة بفضل التغليف الممتاز. وممكن تطلب
المكسرات بتاعتك من غير زيت علشان تبقى صحية أكثر.

المحل
مرتب كويس ما بين المكسرات والحلويات، ومن حقك تجرب كل حاجة والموظفين في المحل بـ
يرحبوا بكده. «أبو عوف» مشهور بالخلطات اللي بـ يعملها بين صنفين زي السوبريم ميكس
وده عبارة عن كاجو وفستق ولوز وسعره 14 جنيه للـ 100 جرام. ولازم تجرب التشيز
مانشيز وده عبارة عن مقرمشات ورقائق ذرة بطعم الجبنة.

لو
كنت من محبي الحلويات زي الناقدة كاتبة المقال يبقى تتوجه فورًا لوسط المحل، هناك
هـ تلاقي تشكيلة كبيرة من الحلويات اللي بـ تُباع بالكيلو أو بالواحدة. كيلو
المانجو المقطعة المجففة بـ 110 جنيه، وكيلو اللوز المغلف بالسكر بـ 45 جنيه.

الجزء الأخير من المحل عبارة عن حائط عليه أرفف عليها
بسكويت ومقرمشات ومخللات شكلها يفتح النفس. برطمان كبير من فلفل الهالبينو كان بـ
16 جنيه. دائمًا هـ تلاقي عندهم بسكويت لسه مخبوز طازج، ده غير الأنواع المغلفة
الكثير المرصوصة جنب الكاشير. وما تنساش رائحة حبوب البن القوية الموجودة جنب
الكاونتر؛ الكيلو منها بـ 105 جنيه.

مكسرات
فريش وبجودة عالية وفي تغليف ممتاز وطبعًا بأسعار مش قليلة. «أبو عوف» إضافة جيدة
للمحلات الموجودة في سيتي ستارز.