على رووف في وسط البلد.. قعدة بطعم موسيقى بليغ حمدي
القاهرة بليغ حمدي خروجات رووف في وسط البلد موسيقى بليغ وسط القاهرة
Cairo 360
يمنى أحمد
صورة ميدان التحرير: REUTERS
فيه حاجات كتير جدًا ممكن تحسسنا بالونس زي لمة العيلة وأكلة حلوة وفيلم قديم وغيره، بس الحاجات اللي بتحسسنا بالونس والحب وتخلينا ننور مش هنلاقيها على طول الخط في رحلتنا.. النهاردة كايرو 360 قررت إنها تفكرك بحاجة من الحاجات دي وهي موسيقى وكلمات بليغ حمدي!
إيه رأيك تقعد في أي رووف في وسط البلد أو التحرير، وتاخد مشروبك المفضل ومعاه أغنية لحنها بليغ حمدي، متخيل كمية الونس اللي ممكن تزورك فجأة؟ هتلاقي كمية مشاعر مختلطة بس كلها جميلة، هتلاقي حب وهدوء وشغف وحماس، هتلاقي قلبك بينبض بالحيوية بعد فترة طويلة مشغول فيها بالظروف والمشاكل والبيت والجماعة!
وتقدروا تختاروا رووف جميل في وسط البلد من قائمة كايرو 360 هنا.
ليه اخترنا لك موسيقى بليغ حمدي؟ وليه في شهر أكتوبر بالذات؟ ده لأنه أيقونة في تاريخ الفن المصري، فنان عرف إزاي يلحن أمزجة المصريين، ولقى طموحه في العاصمة اللي الكل كالعادة بيبحث عن ونس الحياة فيها، فغالبًا مش هتشبع من الأغنية وهتحب تكررها تاني، وكل مرة هتسمعها بمزاج تاني وشغف أكتر، ولأن مافيش مكان احتوى خوف الفنانين وعشقهم للغنا وشغفهم بالحياة في القاهرة زي وسط البلد، علشان كدة القعدة على أي رووف هناك، هتخليك تشم نسمة هوا رايقة ويسلطنك معاها لحن موسيقى بليغ الجميل.
وبالنسبة لشهر أكتوبر فلأن ده الشهر اللي اتولد فيه بليغ حمدي، وهو ده الشهر اللي كسبنا فيه الحرب، فلو أنت نفسك تتأمل مباني القاهرة العالية والنيل وتستشعر عظمة البلد دي بجد، مش هتلاقي فرصة أفضل من صوت أغنية على الربابة اللي لحنها بليغ، ولا أغنية يا حبيبتي يا مصر اللي غناها شادية وبرضو لحنها بليغ، ولا غيرها من الأغاني الوطنية اللي خلصت في خلال أسبوعين وكان نصيب حمدي منها 18 أغنية تقريبًا!
فهتحس إن مصر كسبت بليغ، والحقيقة كان العالم كله مش مصر بس، لأن موسيقاه فريدة بتتكلم عن العشق والجمال، وبتهتم بتفاصيل المشاعر الإنسانية، وبتحسسك بونس الأماكن اللي أنت فيها، وهتعيد لك مشاهد من الزمن الجميل، زمن الفن اللي بجد، الفن اللي كلنا متمسكين بيه كأنه قطعة من روحنا مش بس من تراثنا، ومش عارفين نبطل نسمع كل كلمة اتقالت واتلحنت، وبنندهش من إنها إزاي كل مرة قادرة توصفنا كأننا كنا عايشين في الزمن ده!
