The Definitive Guide to Living in the Capital , Cairo , Egypt

رنا شرف

رمضان شهر السعادة والفرح والخروجات، والخيم الرمضانية لها نصيب كبير معانا في خروجات الشهر الكريم ده. مؤخرًا زورنا خيمة رمضانية مبهجة داخل قصر البارون بمصر الجديدة، وهي خيمة البارون أو خيمة القصر، تعالوا نتعرف عليها أكثر.

المكان مبهر بمعني الكلمة. أول ما هتدخل الخيمة هتلاقي نفسك بتفتح موبايلك وتتصور تلقائي، لأن حاجات كتير في المكان بتشجعك علي التصوير، بداية من الإضاءة المميزة، ومرورًا بالممر الطويل اللي بيوديك لحد الترابيزات اللي في الأوبن أيريا، وهي ترابيزات كبيرة بكراسي مريحة، ووصولًا للديكورات والأجواء الرمضانية المبهجة.

الخدمة في الخيمة ممتازة، وفريق العمل مبتسم وبيرحب جدًا بالمساعدة، وأول ما بتدخل هتلاقي في انتظارك مشروب ضيافة رمضاني بتختاره على ذوقك، سواء سوبيا أو تمر هندي.

سعر الدخول والسحور في الخيمة 550 جنيه، لكن السعر ده غير شامل المشروبات الساخنة، لكنه بيتضمن مع السحور المشروبات الرمضانية فقط.

استمتعنا بموسيقى الدي جي، وحضرنا حفلة لمطرب صوته مميز، ومن حسن حظنا كان الجو لطيف الليلة دي.

أجمل حاجة إن فيو الخيمة مبهر، هو فيه أجمل من إنك تبص على قصر البارون في سهرة جميلة؟

السحور كان مميز وسخن وعلى كيفك، عبارة عن فول وطعمية وبابا غنوج وزبادي وحلو فروت سلاط أو حلويات شرقية، والحقيقة مستوى الأكل كان رائع.

تجربتنا في الخيمة كانت مميزة، وأكيد هنحب نروحها تاني.

تقدروا تحجزوا من خلال رقم: 01099924996.

وتقدروا تعرفوا عن الخيمة أكثر من خلال صفحتهم على فيسبوك هنا.