The Definitive Guide to Living in the Capital , Cairo , Egypt

الشمس والنيل والهواء خلطة سحرية تقدر تخليك تفصل عن زحمة الدنيا وضغوط أفكارك وحكاياتك اليومية. مؤخرًا  أوبر قررت تخوض تجربة تسهل على مستخدميها رحلاتهم وتبعدهم عن الزحمة.

تقدر حاليًا تجرب خدمة Uber Boat بالتعاون مع Nile Taxi والنظام بيكون أنك تقدر تروح لأي مكان من المعادي لحد الزمالك أو بعدها كمان قريب من شبرا وتكلفة الرحلة 80 جنيه لحد أربع أفراد.

الموضوع ممكن يكون عملي لو المبلغ هيتقسم على الأربع أفراد لو أنتم صحاب مثلًا هتكون تكلفة قليلة جدًا لكن لو بمعدل رايح بس لفرد واحد حوالي 80 جنيه وجي زيهم يعني حوالي 160 جنيه في اليوم فده طبعًا حل مش عملي خالص.

قررنا في كايرو 360 نخوض التجربة بنفسنا علشان نتأكد من جودتها.

بدأت رحلتنا من The Platform في المعادي واللي فضلنا حوالي ساعة بنحاول نعمل request للخدمة، لكن للأسف كل شوية الأبليكيشن تعلق ومانوصلش لحد، لحد ما رحنا في المكان اللي فيه Nile Taxi واتكلمنا مع السواق اللي ماكنش عنده فكرة واضحة عن أن Uber  بتقدم الخدمة دي بالتعاون مع الشركة اللي هو شغال فيها، وبعد مع كلمنا Nile Taxi بعتوا لنا مركب وتابعوا معاه بالتليفون لحد ما وصل وقرر يمسك الموبايل ويقبل الـ Request بتاعنا.

ومن المعروف زي ما بعتوا في إيميل خاص لمستخدمي أوبر أن خطوات أنك تطلب مركب أنك تنقي مكانك من على الخريطة وتحطها في النيل، فيظهر لك Uber boat بدل العربية العادية.

وبالرغم من إننا كنا عاوزين نجرب خدمة أوبر إلا أن السواق كان مصمم أنه ياخدنا في رحلة نايل تاكسي العادية مش أوبر واللي كان ثمنها أرخص (120 جنيه)، لكن الرحلة دي بتكون محددة عبارة عن رحلة نيلية مش هيودينا لحد المكان اللي إحنا عاوزينه، يعني مجرد فسحة في النيل.

لكننا طلبنا نستخدم خدمة أوبر وشرحنا له إننا مش بنتفسح لكن رايحين شغلنا.

حاولنا نتجاهل الساعة اللي قضيناها وإحنا عمالين بنحاول مع الأبليكيشن إنها تشتغل، ونركز مع النيل ومنظر الغروب اللي يسحر، ورذاذ المياة وهو بينعشنا. بس ننصحكم لحد ما الموضوع يستقر لو وراكم معاد تبقوا تنزلوا قبلها بساعة على الأقل.

وصلنا للمنيل وعملنا End Request وطلبنا واحد جديد وإحنا مع السواق طبعًا علشان الأبليكيشن بيعلق وفضلنا في المياة حوالي ربع ساعة منتظرين بداية الطلب الجديد، إحنا كنا مستمتعين بالجو بس لو إحنا مستعجلين هتكون مشكلة.

كان نفسنا إننا نستمتع بأكتر من كده ويتطور الأمر إننا نروح شغلنا بـ Uber Boat بس للأسف لسه قدامهم فترة لحد ما يحلوا المشاكل التقنية أو يكون عندهم مراكبهم الخاصة بسواقين مدربين وأبليكيشن مابتعلقش.