The Definitive Guide to Living in the Capital , Cairo , Egypt

في المعادي في مكان هادي جدًا، هتطلع العمارة اللي عليها العين في شارع 9 قدام بنك CIB. وهناك نوعدك، لو أنت من اللي بيحبوا ألعاب الفيديو بكل تطوراتها، يبقى هتنبسط.

المكان مختلف، مش زي أي مكان تاني ممكن تروحه. هو مش كبير، عبارة عن 3 غرف، كل واحدة لها عالم مختلف تمامًا عن التانية. الغرفة الواحدة فيها شاشة كبيرة لو حابب تتفرج على حاجة مع أصحابك. يعني مباراة رياضية شغال، فيلم معاك على فلاشة شغال برضه، أو أفلام من مكتبتهم، كله عادي، تروح وتنبسط وتقعد.

لو أنت من الناس اللي بتحب الألعاب، يبقى أكيد عارف نضارة ال VR، اللي بتخليك عايش جوه “البلايستيشن”. ويا سلام بقى لو استخدمت السماعات، ساعتها ميبقاش فيه غيرك أنت واللعبة. وكمان فيه إمكانية إنك تجيب أصحابك وتلعبوا كلكم مع بعض في نفس الوقت.

كمية الألعاب المتاحة في المكان من (البلاي ستيشن) كبيرة جدًا، وكل لعبة ولها حكاية ومتعة. يعني هيبقى عندك مشكلة لو أنت من الناس اللي بتحب الألعاب أون لاين، ومتابع تطورات البلاي ستيشن، لإنك هاتبقى محتار هتلعب إيه ولا إيه مع أصحابك.

الجميل في فكرة النضارة، إنها بتدخلك جوه اللعبة، وبتحس إنك عايش في عالم ثلاثي الأبعاد. بتجري وتتنطط، وتوطى لحسن حاجة تيجي فيك، أو تصيبك، وتخاف وتنبسط. لحد ما تقول كفاية يا انبساط.

الفكرة بقى إنك لما تروح هناك، هتعيش مع أصحابك وممكن تأجر أوضة من الأوض اللي هناك، وتقعد تشتغل. وأسعارهم مش غالية، وعندهم مجموعة مشروبات تقدر كمان تستمتع بها، وكام نوع حلويات كده حلوين، يعني تقدروا تروحوا وتنبسطوا وتاكلوا.