“إشارة مع سارة”.. مبادرة لتعليم لغة الإشارة للأطفال والكبار وتسهيل التواصل مع مجتمع الصم
أطفال إشارة مع سارة الصم في مصر القاهرة تعليم خدمات دمج مجتمعي كورسات لغة الإشارة مبادرات مصرية مجتمع الصم مراهقين
Mohamed Talaat
تخيل تكون محتاج توصف وجعك لدكتور، أو تشرح مشكلتك لصيدلي، أو تخلص معاملة في جهة حكومية، ومفيش حد حواليك قادر يفهم لغتك أو يتواصل معاك بسهولة، لأن في شوارع القاهرة والمدن المصرية، وسط تفاصيل حياتنا اليومية، ممكن يكون ده موقف بسيط يبان عادي جدًا، لكنه بالنسبة لشخص أصم بيتحول لتحد حقيقي وصعب.
من التحدي ده بدأت حكاية “إشارة مع سارة”، وهي مبادرة مصرية بتسعى لنشر وتعليم لغة الإشارة للأطفال والمراهقين والكبار، بهدف تسهيل التواصل مع مجتمع الصم ودعم دمجهم بصورة أكبر في تفاصيل الحياة اليومية، ومن خلال الكورسات والمحتوى التوعوي والأنشطة المختلفة، بتحاول المبادرة تخلي لغة الإشارة مهارة أقرب للناس، مش لغة مقتصرة فقط على المتخصصين أو أسر الأشخاص الصم.
إزاي بدأت حكاية “إشارة مع سارة”؟
وراء المبادرة دي “سارة عادل”، خريجة كلية الاقتصاد والعلوم السياسية بجامعة القاهرة، واللي لها تجارب عمل في شركات عالمية، منها Vodafone International وNokia، وحاليًا شغالة في مجال التسويق الرقمي، مع اهتمامها بتدريب ونشر لغة الإشارة منذ أكثر من 10 سنوات.
لكن البداية الحقيقية للحكاية كانت مختلفة تمامًا عن مسارها المهني.
سارة قررت تتعلم لغة الإشارة ولكن اكتشفت إن أماكن التدريب المتاحة وقتها كانت محدودة وصعبة الوصول، فاختارت إنها تتعلم بطريقة مختلفة، من خلال التطوع داخل واحد من المراكز اللي بتخدم مجتمع الصم، وهناك بدأت تتعلم لغة الإشارة من الصم نفسهم.
التجربة دي فتحت قدامها عالم جديد، وخلتها تدرك الفجوة اللي ممكن تسببها صعوبة التواصل في أبسط المواقف اليومية، ومن هنا بدأت فكرة إنشاء مبادرة تساعد على نشر لغة الإشارة بين أكبر عدد من أفراد المجتمع.
ليه تعلم لغة الإشارة مهم؟
فلسفة “إشارة مع سارة” قامت على فكرة بسيطة: إن الشخص الأصم من حقه يقدر يعبر عن نفسه ويتواصل مع اللي حواليه من غير ما يكون مضطر للاعتماد على وسيط، وأهمية ده بتظهر بشكل أوضح في أماكن ومواقف حساسة، منها:
المستشفيات والعيادات والصيدليات: للمساعدة في وصف الأعراض وفهم التعليمات الطبية.
أقسام الشرطة والمحاكم: لتسهيل قدرة الشخص الأصم على التعبير عن نفسه وفهم ما يدور حوله.
المؤسسات الحكومية والخدمية: لتسهيل التعاملات والخدمات اليومية.
المواقف الاجتماعية واليومية: لبناء مساحة أكبر للتواصل والتفاعل مع الآخرين.
لأن غياب القدرة على التواصل بلغة الإشارة ممكن يصنع فجوة حقيقية بين الشخص الأصم والمجتمع المحيط به، وهي الفجوة اللي بتحاول المبادرة تقللها من خلال نشر اللغة والوعي بيها.
تدريب الأطفال.. مهارة جديدة ووعي من سن صغير
واحد من الجوانب المميزة في “إشارة مع سارة” هو الاهتمام بتعليم الأطفال والمراهقين لغة الإشارة.
لأن لتعلم في سن صغيرة مش بس بيضيف للطفل طريقة جديدة للتواصل، لكنه كمان بيساعد في تعزيز قيم تقبل الآخر، واحترام الاختلاف، والتعاطف مع احتياجات الآخرين.
وعلشان كده، بتقدم المبادرة تدريبات مخصصة للأطفال والمراهقين بداية من سن 11 سنة، بجانب البرامج التدريبية للكبار.
إيه اللي بتقدمه مبادرة “إشارة مع سارة”؟
نشاط المبادرة مش مقتصر على الكورسات بس، لكن كمان بتعتمد على منصاتها الرقمية لنشر الوعي وتعريف الجمهور بلغة الإشارة بصورة أبسط، ومن أبرز أنشطتها:
فيديوهات تعليمية لتبسيط الكلمات والجمل المستخدمة في الحياة اليومية بلغة الإشارة.
محتوى توعوي عن مجتمع الصم وأهمية تسهيل التواصل والدمج.
دورات لتعليم أساسيات لغة الإشارة للأطفال والمراهقين والكبار.
ورش عمل وتدريبات حضورية وأونلاين.
الإعلان عن الدورات والأنشطة الجديدة عبر المنصات الرسمية للمبادرة.
أسعار كورسات “إشارة مع سارة“
وفق الأسعار المعلنة للمبادرة عند كتابة المقال:
كورس الأطفال والمراهقين: 300 جنيه، بداية من سن 11 سنة.
كورس الكبار: 450 جنيه.
ويُفضل مراجعة الصفحة الرسمية للمبادرة قبل الحجز للتأكد من مواعيد الدورات والأسعار وأماكن التدريب وأي تحديثات جديدة.
إزاي تحجز في كورسات “إشارة مع سارة”؟
الاستفسار عن الدورات والحجز بيكون من خلال التواصل مباشرة مع الصفحة الرسمية لمبادرة “إشارة مع سارة” على فيسبوك من هنا.
والأفضل التأكد قبل الحجز من موعد بداية الدورة، وطريقة التدريب سواء كانت حضورية أو أونلاين، وأي تفاصيل خاصة بالمستوى المناسب للمشترك.
أسئلة شائعة عن مبادرة “إشارة مع سارة“
ما هي مبادرة “إشارة مع سارة”؟
هي مبادرة مصرية هدفها نشر وتعليم لغة الإشارة للأطفال والكبار، والمساهمة في تسهيل التواصل مع مجتمع الصم ودعم دمجه بصورة أكبر في الحياة اليومية.
من هي مؤسسة “إشارة مع سارة”؟
أسست المبادرة سارة عادل، خريجة كلية الاقتصاد والعلوم السياسية بجامعة القاهرة، بعد تجربة تطوعية ساعدتها على تعلم لغة الإشارة والتعرف بشكل أقرب على تحديات مجتمع الصم.
هل تقدم المبادرة كورسات للأطفال؟
نعم، توفر “إشارة مع سارة” تدريبات للأطفال والمراهقين بداية من سن 11 سنة، إلى جانب دورات مخصصة للكبار.
هل تعلم لغة الإشارة صعب؟
تعلم لغة الإشارة، زي أي لغة جديدة، محتاج ممارسة واستمرار، وتبدأ برامج المبتدئين عادةً بأساسيات التواصل والإشارات المستخدمة في المواقف اليومية بصورة تدريجية.
إزاي أقدر أحجز في كورسات “إشارة مع سارة”؟
يمكن الحجز والاستفسار من خلال إرسال رسالة إلى الصفحة الرسمية للمبادرة على فيسبوك ومتابعة مواعيد الدورات وورش العمل الجديدة.
مقترح
فن وثقافة
حفلات التنورة في بيت الغوري 2026.. سهرة مصرية أصيلة بـ15 جنيه بس في قلب القاهرة التاريخية
أماكن سياحية الأزهر +11
معالم وسياحة
