The Definitive Guide to Living in the Capital , Cairo , Egypt

فكرة: دينا خفاجي

أوقات كده وأنت ماشي في الشارع، بتعدي على أماكن ريحتها مميزة بالنسبالك.. بتخلي عقلك ينسى أي حاجة ويركز بس في الريحة دي. ده أنت ممكن تقف شوية جنب المكان، علشان تاخدلك جرعة كافية من الريحة، قبل ما تمشي. عمومًا لو بتعمل كده، فأنت مش لوحدك. كلنا هذا الرجل. يلا بينا نمر في السريع كده على الأماكن دي:

1- البنزينة

ماحدش ينكر الحنين والحب الغريب لريحة البنزين. إدمان من نوع مش مفهوم. أو مرض نفسي، مانعرفش بقى. صحيح مش بتروح علشان تشمه مخصوص، لكن لما بتروح بتبقى عايز تاخد حقك تالت ومتلت من الريحة.

2- محلات الجلود

من الشنطة للمحفظة للحزام، ريحة الجلد تشد أي حد. الواحد بيعمل نفسه بيقلب في الحاجة، لكن في الحقيقة هو بيمسكها علشان يشمها. الإنسان دعيييييف.

3- محلات العطور

طبعًا دي واضحة زي الشمس. أكيد مش هنتكلم عن الأماكن اللي ريحتها مميزة، ومانقولش على المكان اللي أساسه الريحة.

4- محلات اللب والتسالي (المقلة)

انت لو غاوي لب يا معلم، يبقى وش بتفقد كل قواك العقلية قدام المقلة. اللب السوبر وهو لسه طالع من المحمصة وسخن كده، يا سلام. ماتقدرش تمنع نفسك شوية كده تتسلى بيهم. وساعتها هيبقى لب سوبر وسوري وسوداني، وليلة كبيرة أوي سعادتك.

5- مطحن البن

ده بقى مايختلفش عليه اتنين. سواء كييف قهوة وبتشربها كتير، أو يا دوب غاوي فنجان كل ما يجيلك الشوق. ريحة البن اللي طالعة من المطحن بتاخد العقل. تحس إنك عايز تدخل تقول للراجل “اديني البن بسرعة أرجوك محتاج الجرعة”.

6- فرن العيش

ونقصد هنا بالتحديد فرن العيش الفينو. يا سلام على ريحته وهو لسه طالع من الفرن. يخليك حتى لو لسه واكل خروف، تجوع وكأنك ماكلتش من سنين. ساعتها العيش فعلًا من حلاوته بيتاكل حاف. ده غير الفطاير والحلويات التانية، اللي ريحتها لوحدها تبسطك.

7- عربيات الكبدة والسجق

صحيح أكل الشارع مش حلو، بس ما نقدرش ننكر إن ريحة عربيات الكبدة والسجق تهبل. مانعرفش إيه السر إن الطعم أحيانًا ممكن يبقى مش حلو، لكن مع ذلك ريحة كل عربيات الكبدة حلوة. موضوع محتاج دراسة.

8- الفسخاني

على قد ما ناس كتيرة مابتحبش الفسيخ أو حتى سيرته. لكن في ناس تانية بتعشق ريحته. وأول ما تعدي جنب أي فسخاني بتجوع. ده برضه موضوع محتاج دراسة زي الكبدة. لأنه الناس يا إما بتكرهه يا إما بتحبه، مفيش وسط.