The Definitive Guide to Living in the Capital , Cairo , Egypt

مصر بلد غير متوقعة في أي حاجة، بس لو فيه حاجة واحدة تقدر تقولها عن مصر وتكون واثق أنها صح فهي أننا شعب بـ يحب الأكلة الحلوة، لما تركز شوية هـ تلاحظ أن مافيش بلاد كثير عندها التنوع اللي موجود عندنا على مستوى الأطباق المحلية أو الأكلات المميزة. الفكرة أن صحيح فيه أكلات كثيرة بـ تميز المطبخ المصري، المعلومة الجاية دي جديدة عليك وهتفاجئك *صوت صرصور الحقل*.. كل حاجة تعرفها عن الأكل في بلدنا طلع "كذبة".

الدخلة كانت فيها دراما زيادة مش كده؟ المهم أن فيه 8 أطباق مصرية طلعت مش مصرية.

ورق العنب/المحشي

نبدأ مع أكلة لذيذة وسهلة كلنا عارفينها، من المعروف أن ورق العنب دخل مصر في زمن الإمبراطورية العثمانية وأن أصوله ترجع للمطبخ التركي، بس كان عادة بـ يتحشي باللحم مش بالأرز، المصريين غيروا من شكله وحشوه بالأرز والبقدونس والطماطم والكزبرة.

الملوخية

ورق الملوخية العظيم يرجع للعصور الفرعونية، وكانوا أيام الهكسوس والدولة الفاطمية بـ يفتكروه مسمم، فيه حكايات ثانية بـ تقول أنه كان بـ يستخدم زمان للعلاج وأنه كان وجبة الملوك والأمراء بس، مسمم بقى ولا دواء مش فارقة كثير، المهم أن طشّة الملوخية تعتبر إدمان عند ناس كثير.

الفلافل (الطعمية)

هي أكلة أساسية في كل بيت مصري، ومن أكثر الأكلات اللي عليها كلام وجدل، ناس بـ تقول أن أول من قدم أقراص الفلافل اللذيذة كانوا بلاد الشام، وناس ثانية بـ تقول أن أصولها ترجع لمصر وأن الأقباط المصريين كانوا بـ ياكلوه بدل اللحوم أيام الصيام وبعدين وصلت الفلافل للبنان وسوريا وغيرهم، لدرجة أن فيه أقوال بـ تؤكد أنها بـ ترجع للعصور الفرعونية.

الكُشري

يُقال أن أول ظهور للكُشري في مصر كان مع وصول القوات الهندية اللي كانت مع الجيش البريطاني وقت الحرب العالمية الأولى اللي كانوا بـ يفطروا به، الكُشري زمان كان بـ يتعمل من العدس والأرز بس مع شوية زبدة، والإيطاليين في مصر أضافوا وقتها مكرونة، بس طبعًا كان لازم المصريين يضيفوا لمستهم الخاصة ويحطوا صلصة ودقة وبصل مشوي مقرمش.

داوود باشا

صحيح أنه أصبح من أشهر الأطباق في مصر، بس مافيش شك أن كفتة داوود باشا المكونة من كرات اللحم بالصلصة هي على اسم السلطان التركي داوود باشا، فيه قصص قالت أن السلطان طلب الطبق من واحد من طباخينه وما عرفش يعمله صح فعاقبه السلطان داوود، بعد تعديلات كثيرة، الطبق عجب الباشا وسموه على اسمه.

المسقعة

كبرنا على أنها طبق يوناني، بس الغريب أن فيه قصص مختلفة عن أصل أكلة المسقعة، نظريات كثيرة قالت أن المصريين أول ناس يخترعوا الطبق في أواخر القرن 19، أما المؤرخين فاختلفوا إذا كانت من إيطاليا ولا اليونان، المهم دلوقت، فين طبق المسقعة بتاعنا؟!

البقلاوة

واحدة من الحاجات القليلة معانا النهارده اللي ما حصلش فيها تغيير، وده طبق ثاني معروف أنه اختراع منسوب للسلطان التركي، وأنه اختار الاسم على اسم زوجته: "بقلاوة"، المصريين من ساعتها ما كدبوش خبر، وتركيبة العجينة المحشية مكسرات وشربات أصبحت من الحلويات الكلاسيكية في مصر.

الكنافة

صحيح من المستحيل تقدر تتابع تاريخ الكنافة، بس اللي إحنا عارفينه أنها وصلت مصر وقت حكم الدولة الأموية، يُقال أنها ظهرت على يد معاوية بن أبي سفيان مؤسس الدولة الأموية، باعتبارها أكلة هايلة  للسحور في رمضان لأنها بـ تشبع.

جرّينا ريقكم صح؟