The Definitive Guide to Living in the Capital , Cairo , Egypt

كتير مننا بيعتمد على الصور “السيلفي” في رحلاته ومغامراته، كنوع من أنواع توثيق الحدث، أو تكوين ذكريات جميلة، سواء عن الأحداث أو عن المكان اللي بناخد فيه “السيلفي” أو حتى كتذكار جميل لأشخاص جمعتنا بيهم علاقة صداقة أو حب أو زمالة.

النهاردة، فريق كايرو 360 جايبلكم أهم 5 نصائح علشان تاخدوا أفضل صورة سيلفي، تديك طلة المشاهير، وتوثق بيها ذكرى جميلة.. تعالوا نشوف إيه هي النصائح دي:

1 – اختار الإضاءة المناسبة:

يمكن واحد من أهم العناصر في الصورة بشكل عام، والصورة “السيلفي” بشكل خاص هو “الإضاءة” وده لإن الإضاءة المناسبة هتديك  صورة ممتازة، والعكس صحيح.

 الإضاءة المناسبة مش معناها إضاءة “قوية” أو “ضعيفة” لكن معناها إن الإضاءة تبقى مناسبة مع الصورة والمشهد والملابس اللي لابسينها والفكرة اللي عايز توصلها من الصورة.

2- ـ اتأكد من خلفية الصورة:

لما بتبقى خلفية الصورة مش مناسبة أو مش مميزة، بيبقى صعب علينا نحتفظ بيها او ننشرها، لإن باختصار، خلفية الصورة ممكن بسهولة تبوظ الصورة لو مش مناسبة أو مختلفة.

علشان كده، لازم ندقق في الخلفية اللي هنختار نقف قدمها، ونتأكد من إنها خلفية مميزة ومناسبة ونظيفة في نفس الوقت، وياريت لو قدرت تختار خلفيات جديدة ومطرقعة.

أما بالنسبة للصور السيلفي اللي بتركز على إظهار معالم معينة أو مكان معين، المحترفين في التصوير أكدوا على إن التركيب المثالي للصورة لازم يكون عبارة عن ثلث الشاشة ليك (صورتك) وبقية الصورة هيظهر فيها نوعين مختلفين أو أكثر من تركيب الصورة، زي الألوان الطبيعية والأرض، أوالسماء والأرض المستوية والجبال، وأسهل طريقة تقدر تطبق بيها نظرية التركيب وتطبيقه هي الخطوات دي:

– فعل “خطوط الشبكة” من اعدادات الكاميرا في تلفونك.

– خطوط الشبكة هتقسم الشاشة قدامك لـ 9 مربعات، 3 أقسام طولية و3 عرضية.

– صورتك هتكون في الثلث الأول من الكادر، ولازم يكون الجزء ده من جهة الإيد اللي ماسك بيها التلفون، يعني لو كنت ماسك التلفون بايدك الشمال فخليك في التلت الشمال من الكادر.

3 – جرب أكتر من زواية قبل ما تاخد الصورة:

لو انت متعود تاخد صور سلفي كتير، دور في صورك السيلفي اللي اتصورتها قبل كده وركز في الزاوية اللي اخترتها في كل صورة، وأكيد هتلاقي واحدة فيهم زاويتها كانت ممتازة، وبالتالي ظهر وشك بشكل حلو.

أفضل زاوية تصوير للسيلفي هتديك شكل وش رفيع، وعنين واسعة، حاول توصل للزاوية اللي تديك اللوك ده واعتمدها، أو ممكن تجرب أكتر من زواية مختلفة ولاحظ الفرق في شكلك في كل زاوية واختر الأجمل.

عدسة الكاميرا هي اللي بتخلي أشكالنا غريبة في الصور، علشان كده يفضل إنك تجرب أكتر من زاوية لحد ما توصل للزاوية المناسبة، والموضوع ده فيه مدارس، المدرسة الأولى بتقول إن الجهة الشمال من الوش هي الجهة الأجمل في التصوير، علشان كده الصورة بتكون بزاوية بتبين الجزء الشمال من الوش.

المدرسة التانية بتقول إن الصورة من فوق هتخلي عينك تبان أوسع وأكتر جاذبية.

4 – اعتمد على عصاية السيلفي أو الـselfie stick  :

كتير مننا بيعاني من اهتزاز إيده وهوه بياخد الصورة، ده غير إننا بنحاول على قد ما نقدر نبعد الكاميرا عننا، وده لإن كل ما زاد بعد الكاميرا عنك كل ما خدت صورة سلفي أفضل وأحسن، وده لإن الكاميرا كل ما هتبعد كل ما هتباين إمكانيات وتفاصيل جميلة أكتر. وعلشان كده، وكأفضل طريقة تبعد بيها عن أي اهتزازات في الصورة، وتاخد بيها المسافة المطلوبة واللي تديك كادر لطيف، هي استخدام “عصاية السيلفي” أو الـselfie stick .

ولو كنت مع مجموعة من أصحابك في صورة سيلفي واحدة، خلي أطول شخص بينكم هوه اللي يمسك عصاية السيلفي، ويقف بحيث الكل يبقى ظاهر في الصورة بشكل واضح.

5 – خد أكثر من صورة مع بعض في وقت واحد:

حاول دايمًا تاخد أكتر من صورة واحدة في نفس الوقت، علشان تتلافى أي خطأ ممكن يحصل في الصورة، زي مثلًا إنك تكون مش باصص للعدسة أو مغمض عينك، علشان كده حاول ماضيعش اللقطة والكادر، وخد أكتر من صورة وبعدين ابقى اختار الافضل من بينهم.

وبما اننا بنحاول دايمًا ناخد أفضل صورة، حاول دايمًا تبتكر صورتك السيلفي الخاصة بيك، وحاول تبعد عن الصور المتكررة والمنتشرة.