The Definitive Guide to Living in the Capital , Cairo , Egypt

المشكلة الكبيرة في التعامل مع أي لغة جديدة هي الفجوة اللي بتبقى موجودة بين المعنى اللي في دماغك وبين التعبير عنه.. أنت بتفكر بلغتك الأصلية، المعنى بيبقى حاضر في ذهنك بيها مش باللغة اللي أنت عايز تستخدمها، فبتاخد وقت ومجهود ذهني في الترجمة قبل ما تتكلم أو تستعمل اللغة الجديدة.. وبتفضل الخطوة الوسيطة دي عاملة قلق وتأخر نسبي في التعامل، وبتزيد كل ما بعدت عن الممارسة، وبتقل لحد ما تتلاشى تقريبًا كل ما ممارستك زادت.

مقدمة غريبة شوية على موضوع متعلق باللغة العربية اللي هي -المفروض- لغتنا الأصلية.. لكن خلونا نعتبر دي مغالطة، ونقول أنه اللغة العربية هي أقرب لغة للغتنا الأصلية، لكن مش هي أبدًا.. لشدة التباعد بين لغتنا العامية الدارجة وبين الفصحى نقدر نعتبرها لغة مستقلة، وهي اللي تبقى لساننا الأصلي، هي اللي بنفكر بيها واللي بنستعملها بتلقائية من غير تحضير وتفكير.. وبالتالي فالتعامل مع العربية هيكون شبه التعامل مع أي لغة أجنبية تانية.. كل ما في الأمر أنها لغة قريبة شوية مننا، ومألوفة حبة لينا، وألفاظها أقرب للفهم.

طيب.. بالنسبة لنا إحنا بقى كأشخاص مشتغلين باللغة العربية سواء للكتابة أو للمحاضرة أو لأي سبب آخر.. إزاي نشتغل على الموضوع ونحسن لغتنا تدريجيًا ونعرف الصح من الغلط و.. و..

بص يا سيدي، عندنا سكة من أتنين، الأولى غالبًا بتبقى صعبة وطويلة حبتين، وهي سكة التعلم بالشكل الأكاديمي لعلوم اللغة العربية على إيد متخصصين وصعود السلم التعليمي درجة درجة لحد ما نوصل لمرحلة الإتقان، ودي سكة هتخليك أكثر متانة وقوة معرفيًا أكيد، لكنها طويلة ووراد جدًا ماتبقاش متاحة لمعظمنا بسبب الوقت أو حتى بسبب أنه مش ده احتياجنا.. إحنا يادوب عايزين نعرف القدر اللي نقدر نتعامل بيه وكفاية على كده.

أما السكة التانية وهي اللي هنركز عليها وهنقول فيها كلام كتير.. فهي سكة أنك تشتغل على اللغة كمهارة مش كعلم، وتبدأ تشوف إزاي تكتسب المهارة دي وتبقى بتفعلها في استخدامك بسهولة، وعلشان ده يحصل.. خد الروشتة دي:

1- اسمع نصوص عربية كتير..
ابن خلدون في مقدمته الشهيرة قال: “السماع أصل المَلَكَات اللسانية”.. يعني إيه الكلام ده؟
يعني -بتبسيط شديد- الاستماع هو اللي بيقوِّم في نفسك مهارة التحدث بلغة ما بشكل صحيح.. فأنت كل ما تسمع كتير كل ما هتلاقيك بتكتسب الكلمات في سياقاتها الصحيحة، وتعرف نطقها، والإعراب بالنسبة لك يبقى إحساس حتى لو مش دارس ومذاكر، وهكذا..
طيب نسمع إيه بالضبط؟
– الإذاعات والبرامج اللي بيتكلم فيها المذيع بلغة عربية صحيحة، بي بي سي العربية، إذاعة القرآن الكريم، وغيرهم.
– على ساوند كلاود في أكونت لمشروع اسمه “رُواة”، بينتقي نصوص عربية جميلة وبيسجلها صوتيًا، وبينشرها.. هتستمتع بالنصوص وجمالها، والموضوع هيفرق معاك جدًا في اكتساب النطق الصحيح واكتساب مفردات جديدة، تابعهم من هنا.
– اتفرج على المسلسلات التاريخية العربية اللي النص بتاعها قوي ومضبوط.. ثلاثية وليد سيف عن الأندلس اختيار ممتاز جدًا.. “صقر قريش”، و”ربيع قرطبة”، و”ملوك الطوائف”.. النص قوي جدًا وممتع وخالي من الأخطاء تقريبًا+أن القصص جميلة والأخطاء التاريخية تكاد تكون مش موجودة، فالموضوع هيبقى مفيد على أكتر من ناحية وممتع لأكتر من سبب.

2- تفاعل بالفصحى..
خلي لنفسك كده وِرْد ثابت من التفاعل باللغة العربية، سواء بالكتابة أو الحديث، ده هيكشف لك المشاكل أكتر وهيخليها أوضح علشان تقدر تشتغل عليها مباشرة، غير أنه هيرفع تدريجيًا عنك الحرج والارتباك والخوف عند الحديث.. فهتبقى أثبت وأشجع وفرصة تحصيلك هتبقى أكبر.

3- افتح نفسك على النصوص العالية..
دايمًا بنفضل ندور في فلك النصوص الركيكة لحد ما قاموسنا يقف عند مجموعة تراكيب محدودة وألفاظ قليلة، إنما لو شوية شوية تدرجنا وجربنا نروح لحاجات أقيم وأتقل هنحس بجمال اللغة أكتر، وهنعلى بذوقنا واحدة واحدة، وبالتالي هيعلى أداءنا اللغوي برضه واحدة واحدة.. بدل ما نقرأ لبعض الكتاب المعاصرين اللي لغتهم خفيفة ممكن نرجع بالزمن حبة بسيطة ونقرأ لناس لغتهم أتقل زي الرافعي والعقاد مثلًا، الموضوع هيفرق مع الوقت وإن كان هيبقى تقيل شويتين في الأول أكيد.

4- استراتيجية سد الفجوات..
مش معنى أن سيرنا في في السلم التعليمي مابقاش متاح أننا نهمل خالص فكرة التعلم المقصود حتى لو بشكل عشوائي ومش مرتب، معلومة هنا.. موضوع يمين.. قاعدة شمال.. أي حاجة بتعرفها هي في الواقع بتسد فجوة موجودة عندك، لغاية ما مع الوقت هتلاقي تحصيلك قفل كل الفجوات الموجودة وغطى كل المواضيع اللي أنت بحاجة لتغطيتها.. من الحاجات اللي هتساعدك ده جدًا بعض الصفحات الموجودة على فيسبوك المهتمة بالهدف ده تحديدًا.. زي صفحة “اكتب صح” واللي شغالة أكتر على الكتاب والمحررين، وبتشاور على أكتر الأخطاء الشائعة وتصححها، وهكذا.. تقدروا تتابعوهم من هنا.
كمان صفحة “نحو وصرف”، ودي محتواها ثري جدًا وممتع جدًا جدًا وبيقدموه بشكل بسيط وسهل، كل شوية ينزلوا معلومة أو موضوع ويغطوه بشكل كويس جدًا، من أكتر الحاجات اللي هتفيدك في سكة الإتقان وتحصيل ثقافة عربية جيدة.. تابعوهم من هنا.

5- أول ما تيجي الفرصة: اتعلم..
خلينا متفقين أنه لا شيء يُغني عن التعلم وبذل المجهود لحد ما نتملي بالكامل بشكل صحيح.. وده موضوع كبير ممكن نبقى نكلمكم عنه بعدين بشكل منفصل، لكن مبدئيًا نقدر نقول لكم أنه قناة الأزهر على يوتيوب عليها شروحات لكتب لغة كتير بيشرحها أساتذة متخصصين ممكن تساعد، والكتب الأكاديمية اللي بتتدرس في كليات الآداب والتربية برضه ممكن تساعد.