The Definitive Guide to Living in the Capital , Cairo , Egypt

الصورة الرئيسية: Mohamed Ahmed

رغم الشمس والحر، لكن هتفضل أيام الصيف هي أجمل الأوقات للخروج، والقاهرة مدينة بتحب الشمس والشمس بتحبها، علشان كدة هنعرفكم على مجموعة خروجات منعشة مناسبة للأيام دي، ولكن خلينا في البداية نفكركم أن الخروج في الشمس محتاج دائمًا كاب أو يكون معاكم شمسية، لأن الحرارة ممكن تتسبب في ضربة شمس، ودي أعراضها صعبة وسريعة، وكمان ماتنسوش دايمًا يكون معاكم مياه لترطيب الجسم.

يلا نتعرف على 5 خروجات مميزة على النيل في الأجواء الحارة.

أهل مصر

ممشى أهل مصر حاليًا من أهم الأماكن اللي تقدروا تتمشوا فيها بتذكرة تمنها 20 جنيه، وكمان فيه كمية كافيهات ومطاعم مميزة كتيرة جدًا تناسب كل الأذواق، وكمان فيه جراج تابع للمشى لو معاكم عربية، وهتسمتعوا بالتصوير وسط الأجواء النيلية، وكمان تقدروا تاخدوا مركب من الممشى للإبحار في النيل بـ50 جنيه الفرد.

الأندلس

أو “الفردوس الأسباني” زي ما بيتقال عليها بسبب جمال ديكوراتها وتخطيطها، وهي من الحدائق المميزة ومسجلة كتراث خاص لأن بعض أشجارها عمرها أكتر من 100 سنة، وموجودة على نيل الزمالك وبجوار دار الأوبرا المصرية ومتاحة يوميًا حتى 10 مساءً وسعر التذكرة 10 جنيه.

أم كلثوم

في شارع عبد العزيز آل سعود وبالتحديد جنب كوبري الجامعة وأمام مسجد صلاح الدين هتلاقوا حديقة أم كلثوم اللي فيها ممشى بيحاوطه كراسي وتماثيل مميزة، وهي بفيو مفتوح على النيل وسعر التذكرة 10 جنيه ومتاحة يوميًا حتى 11 مساءً، وكمان فيها ميزة تانية أن جواها فيه ملاهي للأطفال وده مناسب للخروجات العائلية.

جزيرة المعادي

أشهر خروجة على النيل في القاهرة، لأنها من أجمل الأماكن اللي هتستمتعوا بيها بأجواء مختلفة على النيل، وفيها أنشطة ومطاعم وكافيهات كتير، وموجودة على كورنيش المعادي بعد كوبري السلام وسعر التذكرة 35 جنيه في الأيام العادية و50 جنيه في الويك إند، وبتبقى متاحة حتى 12 مساءً.

الفنون

لو عاوزين تشوفوا فيو مختلف للنيل أو تشوفوا لحظات الغروب مع النيل، يبقى لازم تزوروا حديقة الفنون في المنيل، واللي هتشموا فيها نسمة هواء مميزة مختلطة بين رائحة النيل والأشجار الخضراء هتخليكم في حالة روقان وراحة بال، وخلوا بالكم من الكافيهات اللي هناك لازم تسألوا عن الأسعار قبل ما تقعدوا، وسعر التذكرة 10 جنيه، ومفتوحة يوميًا حتى 12 مساءً، وهي موجودة بجوار نادي الضباط بالمنيل.