The Definitive Guide to Living in the Capital , Cairo , Egypt

كل سنة بنحتفل بيوم اليتيم في أول جمعة من شهر أبريل، لكن الحقيقة اليوم ده بالشكل اللي بنحتفل بيه ممكن يكون حاجة جارحة للفئة المستهدفة منه، لأن الناس بدل ما بتبسطهم بتزود حزنهم.. علشان كده فريق #كايرو_360 حب يدردش معاكم في شوية حاجات، وهدفنا تفرحوا الأطفال الأيتام، من غير ما تكونوا سبب في أي جرح لهم.

ما تقولش على دور الأيتام “ملاجئ”

تخيل أنت لو حد سمى بيتك ملجأ، صحيح الأطفال دول مش عايشين في بيت عادي لكن الكلمة دي بتحسسهم بأنهم أقل من الناس العادية في حين كلمة دار زي بيت بتوصف البيت اللي بيوفر لهم الرعاية والحنان والتقبل اللي هم محتاجينه.

تزورهم باستمرار مش مجرد يوم في السنة

من الحاجات الل بتضايق الأطفال جدًا أنك تزورهم يوم واحد بس وتسيبهم السنة كلها، وهم بيكونوا محتاجين إنهم يحسوا بالاهتمام والرعاية أكتر من احتياجهم للهدايا اللي أنت بتشتريها، فيا ريت تحاول تزورهم باستمرار وتختار من البداية دار قريبة من بيتك بدل ما تروح مرة وتوعدهم بالزيارة تاني وهم يصدقوك وبعد كده تختفي.

اسمعه وما تجرحوش

يا ريت تبقى رايح وأنت مستعد تسمع منهم بس مش لازم عن تفاصيل يومهم، خليهم يحكوا لك عن أحلامهم وطموحاتهم، وبلاش كل شوية تفضل تمسح على دماغه علشان هم بيبقوا فاهمين أنك بتعمل كده علشان الثواب، فشكلك بيبقى بايخ قوي حتى لو أنت ساعات مش بيكون قصدك، كمان بلاش نظرة الشفقة ويا حبيبي ويا حرام والكلام ده، لأن ده فعلًا بيجرحهم وبيخليهم مش عاوزين يشوفوا ناس في اليوم ده. ولو حبيت تدخل عليهم بهدية يا ريت تكون حاجة مفيدة فعلًا، زي الكتب مثلًا، وممكن تشترك مع أصحابك وتشتروا كاميرا مثلًا وتدربوا الأطفال على التصوير بيها. بلاش الهدايا التقليدية.

استأذنه قبل ما تتصور معاه

لو حبيت تتصور مع الأطفال يا ريت تستأذنهم قبل ما تعمل ده، ويفضل ما تنشرهاش في كل مكان بدافع الحفاظ على مشاعرهم، من الآخر مش المفروض أنك تتمنظر على حسابهم.

أوعده باللي تقدر تعمله

 كثير من الأطفال بيفقدوا ثقتهم في المجتمع لما بييجوا ناس يزوروهم ويوعدوهم أنهم يجوا كل يوم، والأشخاص دي لظروف حياتهم يختفوا، بلاش تعلق الأطفال بآمال زائفة.