The Definitive Guide to Living in the Capital , Cairo , Egypt

إجازة عيد الأضحى السنة دي حوالي أسبوع، وبالتالي هي إجازة طويلة نسبيًا ممكن تعملوا حاجات كتير فيها، ومن أهم الحاجات دي هي الخروجات جوا القاهرة والمحافظات القريبة، اللي فيها أماكن مميزة تقدروا فيها تلعبوا في الهواء الطلق وسط الخضرة، وتركبوا خيل، وتبلبطوا في المياه كمان، وغيرها من النشاطات المختلفة.

تعالوا نتعرف على 5 أماكن ينفعوا لخروجات عيد الأضحى 2023.

خان خديجة

المكان ده موجود في طريق الإسكندرية، وهو عبارة عن حمام سباحة كبير مساحته 1500 متر، وطوله 80 متر، وفيه أكوا بارك كبيرة، وكمان بيكون فيه جولات بالمركب جوا بحيرة، وبدالات مائية، ده غير أنكم تقدروا تصطادوا سمك وألعاب الأطفال وحمام سباحة السيدات.

ومن ضمن أنشطة المكان ركوب الخيل، وألعاب بلياردو وتنس طاولة، وحفلات وأوبن بوفيه، وسعر الفرد بيكون 325 جنيه طوال اليوم، والأطفال بسعر 200 جنيه.

تقدروا تعرفوا أكتر عنهم من خلال صفحة الفيسبوك من هنا.

بيت زينة

بيقدم بيت زينة مجموعة من الأنشطة المميزة في الجيزة، ومن ضمنها نيشان بالبندقية، تنس طاولة، كرة سرعة، وكل دول سعرهم 50 جنيه كباكيدج واحدة تلعبوهم مع بعض، وكمان عندهم ركوب خيل جوا المزرعة بسعر 200 جنيه في الساعة، ورحلة السفاري بالخيل سعرها 250 جنيه.

كمان عندهم مشروبات تبدأ من 10 جنيه، والأكل يبدأ 25 جنيه.

تقدروا تعرفوا أكتر عنهم من خلال صفحة الفيسبوك من هنا.

قرية الوادي

من الأماكن اللي بتقدم عروض ترفيهية كتير، وكمان برنامجهم بيشمل وجبات أكل، واليوم بيكون مختلف بالتأكيد وسط الطبيعة والمياه، وبيستقبلوكم بالمزمار البلدي والخيل، وطول اليوم فيه دي جي شغال، وعروض فنية وشو، وفقرات نحت شرقي وتنورة وبخور، وفنون شعبية من كل مصر، ده غير الشو الأفريقي وعرائس الأطفال، وفقرة الحصان، وماتنسوش أنكم تقدروا تركبوا جمال وخيل في المكان، غير ألعاب تانية كتير.

تقدروا تعرفوا أكتر عنهم من خلال صفحة الفيسبوك من هنا.

الريف العربي

قرية الريف العربي في المريوطية من أجمل الأماكن اللي بتقدم أنشطة كتيرة للكبار والصغار، وعندهم السنة دي في العيد عرض 270 جنيه للفرد، و150 للأطفال، ويشمل فطار وغداء واستخدام حمام السباحة وأكوا بارك، ده غير الحفلات.

وكمان عندهم ركوب جمال وخيل، وسينما D7 وقطر وفنجان كهربائي، وستديو تصوير بملابس تاريخية، وألعاب بطين الصلصال ورسم حنة، وأسعار الأنشطة اللي خارج العرض بتبدأ من 10 جنيه.

تقدروا تعرفوا أكتر عنهم من خلال صفحة الفيسبوك من هنا.

جزيرة السعادة

من أهم الأماكن اللي زيارتها في العيد فرحة، وهي موجودة في المريوطية هرم، وعندهم أكتر من باكيدج تختاروا منهم بداية من 110 جنيه، حتى 225 جنيه.

عندهم ألعاب كتير أشهرهم “الونش والتسلق – القطار الكهربائي – الغسالة – العربيات – العجل – النيشان – الشلال – الترمبولين – بيت الكور – الأوربت – الفنجان”.. وغيرهم من ألعاب كتير جدًا هتستمتعوا بيها، وده غير ركوب الخيل والبدال المائي والبيتش باجي.

جزيرة السعادة بتشتغل فترتين، الأولى من 9 صباحًا لـ6 مساءً، والثانية من 7:30 مساءً، حتى 1 صباحًا، وأسعار المشروبات تبدأ من 5 جنيه، وحمام السباحة شغال في الفترتين، ومتنسوش تقدروا تباتوا عندهم أو تقضوا داي يوز بغرفة.

تقدروا تعرفوا أكتر عنهم من خلال صفحة الفيسبوك من هنا.