The Definitive Guide to Living in the Capital , Cairo , Egypt

بعضنا في كتير من الأوقات بيتعرض لمواقف لا يحسد عليها، ويمكن من أرخم المواقف دي إن تليفونك يقع منك في الماء، أو يتعرض للماء بأي شكل من الأشكال، خصوصًا مثلُا لو الدنيا مطرت عليه.

ولإن التليفون بقى جزء لا يتجزء من حياتنا اليومية، سواء بنستخدمه في شغل أو دراسة أو تواصل مع الناس أو حتى للعب والترفيه، وعلشان كده هو مهم ومفيش غنى عنه، ولو حصله حاجه، بتحس إنك تايه.

في حالة إن تليفونك  – لاقدر الله – اتعرض لماء بشكل أو بآخر، دي مجموعة من الحلول السريعة اللي تقدر تنقذه بيها:

1- الخطوة الأولى: خرج التليفون من الماء وإطفيه وفكه، وخرج البطارية منه، لإنك بكده هتقطع مصدر الطاقة عن التليفون، وبالتالي هتقلل احتمالية حدوث ماس كهربائي، كمان يا ريت تشيل الشريحة وكارت الميموري.

2- الخطوة الثانية: امسح كل أجزاء الجهاز بشكل كويس جدًا بفوطة أو قماشة علشان الرطوبة، وبلاش تستخدم المناديل العادية نهائي لإنها مش تمتص الرطوبة بشكل كويس.

3- الخطوة التالتة: وهي إنك تستخدم حاجه من الاتنين، يا المكنسة الكهربائية، يا مجفف الشعر (السشوار) علشان تنشف الماء من جوه التليفون، لكن الحقيقة إن استخدام (السشوار) من الأخطاء الشائعة في الموضوع ده.

لازم تعرف أن تدفق الهواء مش بس هيزق الماء جوه التليفون أكتر، لا ده كمان هيدوب بعض القطع الصغيرة في التليفون، وبالتالي هيبوظ التليفون بشكل كامل، لكن المكنسة الكهربائية أفضل في الحالة دي، بس خلي بالك ما تقربش خرطوم المكنسة من التليفون أوي أو تخليه يلمسه، وخليك على الوضع ده لمدة من 7 – 10 دقائق.

4- الخطوة الرابعة: حط التليفون في صندوق أو طبق فيه (رز) أو أي مادة ماصة للرطوبة، وعرضه للشمس، ويستحسن يفضل على الشكل ده لمدة يوم أو يومين، وقلبه من وقت لحد ما الماء من كل الفتحات، وبعد ما تتأكد من خروج الماء بشكل كامل، حاول تشغيله مرة تانية.

في حالة إن الخطوات اللي فاتت دي مانفعتش وفشلت، روح لأقرب مركز صيانة معتمد، وبلاش تشغل التلفون فورًا أو توصيله بجهاز تاني أو مصدر طاقة شحن أو توصيله بالكمبيوتر، الحالة الوحيدة اللي ممكن تجرب تشغله فيها هي بعد ما تنشفه بشكل كامل، لإنك لو شغلته وهو فيه نقطة ماء، ممكن يحصل ماس كهربائي وتتعطل كل جميع أجزاء الجهاز.

بنتمنى لكم السلامة دايمًا .