The Definitive Guide to Living in the Capital , Cairo , Egypt

أيام قليلة وتبدأ الدراسة! ولو ماكنتش خرجت وانبسطت في الإجازة، لسة عندك الفرصة تستمتع بخروجات مميزة في حضن نيل القاهرة، خاصةً وأن درجة الحرارة في القاهرة عالية الفترة دي، علشان كدة هنعرفك على 3 خروجات نيلية هتخلي الجو ألطف، وهتخليك ترجع للدراسة وأنت نشيط وموودك حلو.

تعالى نعرفك على 3 أنشطة تقدر تمارسها في حضن نهر نيل القاهرة بأسعار مميزة.

الأتوبيس النهري

الأتوبيس النهري من أجمل الأنشطة اللي ممكن تستمتعوا بها في النيل، وهو كمان أرخص حاجة موجودة في نهر النيل، وهتلاقوه بمحطات “ماسبيرو – الجامعة – ساحل روض الفرج – مصر القديمة – إمبابة – أبو الفدا – المعصرة – الحوامدية”، وسعر التذكرة على قد الإيد.

وبتبدأ مواعيد عمل الأتوبيس النهري من الساعة 6 والنصف صباحًا وحتي الساعة السادسة مساءً مع توقعات بمد فترة العمل خلال إجازة العيد والصيف إلى الساعة الثامنة مساءً.

كياك النيل

فكرة أنك تبقوا قاعدين في مكان وبتلفوا النيل بكل اتجاهاته وبراحتكم وبتعملوا رياضة محبوبة فكرة عبقرية، وده اللي تقدروا تعملوه من خلال ركوب قارب صغير، وتجدفوا بمجداف واحد يمين وشمال، وهي من أقدم الرياضات في العالم، وموجودة في أماكن كتير في القاهرة “الزمالك – الدقي – المنيل – المعادي”، ويبدأ سعرها من 100 جنيه، ودايمًا بيبقى فيه عروض ورحلات بأسعار أقل.

التاكسي النهري

معروف باسم Nile Taxi ومميز بلونه الأصفر. له مواعيد خاصة للتحرك من المحطات الرئيسية “المعادي – ماسبيرو”، وهو عبارة عن لنش صغير بيساع 11 فرد، وفيه أصغر منه بيساع 5 أفراد فقط، وبيغطي مناطق “ماسبيرو – جاردن سيتي – الزمالك – المنيل – المعادي” وموجود في كل منطقة منهم مرسى خاص عليه اليافطة الخاصة بيه، وبيقطع المسافة من نايل سيتي لحد المعادي لو مباشرة بدون توقف في 15 أو 20 دقيقة، ولو فيه توقف بتوصل لـ30 دقيقة، وتقدروا تركبوه بتذكرة للفرد في المواعيد الرسمية بسعر 75 جنيه للفرد، أو حجزه خاص بسعر 375 جنيه بأقصى عدد 5 أفراد.