13 خروجة في القاهرة سعر تذكرتهم أقل من 13 جنيه
أماكن اقتصادية في القاهرة حدائق القاهرة خروجات خروجات اقتصادية خروجات رخيصة في القاهرة متاحف القاهرة
Cairo 360
رنا شرف
الصورة: حاتم مشير
لسه بنحتفل معاكم بمرور 13 سنة على انطلاق موقعنا كايرو 360، والنهاردة معانا 13 مكان لخروجة مميزة في القاهرة سعر تذكرتهم أقل من 13 جنيه.
حديقة الفنون
لو أنت من عشاق الطبيعة والجو الحلو الساحر يبقي حديقة الفنون في المنيل هي الأنسب لك. سعر تذكرة الدخول 10 جنيه، والحديقة فيها كافيهات وممكن تكون مناسبة ليوم تفصل فيه من الدوشة وتستمتع بالهواء والخضرة.
حديقة الحيوان
لو بتحب الحيوانات والطبيعة يبقي حديقة الحيوانات بالجيزة مكان مناسب لك. الحديقة لسه لها نفس شكل زمان وهتستمتع فيها بتفاصيل كتير ولو بتحب التصوير أكيد هترخج بصور جميلة. التذكرة سعرها 5 جنيه.
حديقة الأسماك
محبين الكائنات البحرية لهم نصيب معانا. سعر دخول حديقة الأسماك في الزمالك 5 جنيه.
كوبري المانسترلي
لو حابب تتمشى وتتصور وسط فيو حلو، يبقي كوبري المانسترلي هو مكانك! والمكان مجاني.
متحف الفن الإسلامي
من المتاحف المميزة والجميلة في مصر، وكمان له جمهوره الواسع المحب للتاريخ الإسلامي، سعر التذكرة للطالب 10 جنيه ولغير الطالب كمان مش مبلغ كبير، وهتستمتع هناك بتجربة جميلة.
قصر محمد علي
ولسه معانا جو التاريخ المبهر والمحبب لناس كتير، وواحد من أهم القصور الموجودة في مصر، قصر محمد علي في المنيل، سعر التذكرة للطالب 10 جنيه.
المتحف القبطي
من المتاحف المهمة، واللي سعر تذكرتها للطلبة 10 جنيه. المتحف القبطي موجود في مصر القديمة.
متحف أم كلثوم
من المتاحف المهمة، واللي بطله الرئيسي هو شخصيه السيدة أم كلثوم. هتنبسط بزيارته، وسعر التذكرة 10 جنيه.
حديقة الحرية
سعر حديقة الحرية 10 جنيه، وهناك هتستمتع بجو جميل، ولو بتحب التصوير هتنبسط جدًا هناك.
مركز الخزف والفخار بالفسطاط
من الأماكن الحلوة في مصر القديمة، ولو كنت بتحب الخزف والفخار يبقي هتلاقي هناك حاجات حلوة تشتريها، وكمان هتستمتع هناك، والزيارة مجانية.
متحف المركبات الملكية
من المتاحف المميزة، وسعر الدخول للطالب 10 جنيه. هتستمتع هناك بكل وسائل المواصلات الملكية المبهرة.
متحف ركن فاروق
من الأماكن الحلوة التاريخية اللي هترجعك لفترة مهمة من تاريخ القاهرة، سعر التذكرة للطالب 10 جنيه.
كوبري قصر النيل
تمشية جميلة في الجو الحلو ده، هتقدر تشوف نيل القاهرة العظيم، وممكن تاخد أجمل صور، والجميل إن كل الحاجات المبهجة دي مجانًا!
