10 حاجات مبتكرة ممكن تقدمها للأطفال في يوم اليتيم
Dina Mokhtar
في الجمعة الأولي من شهر أبريل مصر بـتحتفل بيوم اليتيم. وبالرغم من أننا بـنؤمن بأن فيه حاجات كده ما ينفعش أننا نركز عليها في يوم واحد وبقية السنة نمر عليها مرور الكرام –زي عيد الأم ويوم اليتيم- ولكن أهو أحسن من ما فيش. وبما أن الأيتام زي بقية الأطفال محتاجين حب ورعاية، هنقترح عليكم شوية أفكار بسيطة ممكن تعملها أنت وأصحابك للأيتام هـتدخل السرور على قلبهم ولو ليوم واحد… وهنيئًا لك يا فاعل الخير!
1 – جلسة حكي:
مش لازم تبقى فنان أو صوتك رخيم علشان تمسك كتاب وتحكي حدوتة لمجموعة من الأطفال، كل اللي عليك أنك تبقى على طبيعتك وأنت بـتحكي.. اشتري قصة بسيطة ينفع يستوعبها أكبر عدد من المراحل العمرية، وحاول تقرأها مرة أو اثنين قبل ما تروح، ولو عرفت تقلد أصوات الشخصيات قلد يا سيدي… عن تجربة، الأطفال جُمال وبـيشوفوا الجمال في أي حاجة… وهـينبسطوا.
ما تنساش تسيب الكتاب في الدار قبل ما تمشي، ولو رحت بيه إيفنت خاص بيوم اليتيم ممكن تسيبه للمسؤولين عن الدار.
هـتلاقي الكتب في ديوان، مكتبة أ أو حتى مكتبة دار المعارف في وسط البلد.
2- تلوين على الوجه:
دي بقى من الحاجات اللي ممكن تخلي أي طفل ينبسط. ولو ما لكش في الرسم، ما تقلقش خالص… هما أصلًا مش هـيبقوا شايفين أنت راسم إيه على وشهم (مش معنى كدة أنك ترسم أي حاجة برضه على وشهم). طبعًا ما تنساش أن مش أي ألوان بـتستخدم على الجلد –مش عايزين الولاد برضه يتنقلوا على المستشفى بحساسية جلدية- بس ما تقلقش تقريبًا الألوان اللي ممكن تستخدمها بأمان على الجلد متوفرة في كل مكان وبأسعار مناسبة؛ زي ألوان – Alwan وسمير وعلي – Samir & Ali.
ممكن تجرب الأول على وشوش أصحابك (بـنهزر طبعًا).. الأفضل تجرب على ورقة بقلم عادي قبل ما تروح؛ ترسم للبنات فراشة ووردة وللولاد ترسم لهم مثلث على أنفهم وثلاث شنبات يمين وشمال على خلفية برتقالي وأهم بقوا نمور وأسود.
3 – جلسة رسم وتلوين:
سهلة، علبة ألوان خشب (36 لون علشان ما تلاقيش نسخة مصغرة من مذبحة القلعة حصلت) ورزمة ورق A4 أبيض وقل لهم يرسموا اللي هم حابينه. في مرحلة الرسم والتلوين دي تقدر تشجعهم وتقول لهم كلام حلو، وممكن أنت كمان تطلع الفنان اللي جواك وتشاركهم نشاطهم.
ولو تعرف ترسم ولو حاجة بسيطة (وردة، شجرة، عربية، طيارة) ارسم كل حاجة على ورقة وصور منها في أي مكتب تصوير مستندات نسخ كثيرة وسيبها في الدار.. لو الفن مش موهبتك، بسيطة؛ فيه مليون موقع إلكتروني ممكن تنزل منه صور جاهزة للتلوين وتطبع منها واحدة وتصوّر منها على قد ما تقدر.
4 – 30 دقيقة رياضة:
سواء كنت من محبي الرياضة، أو لأ ممكن بمنتهى البساطة تلبس تي شيرت وبنطلون رياضي، وقبلها اتفرج على فيديو تمارين بسيطة وكرر العملية.. ولو عايز بقى الموضوع يبقى حماسي أكثر ممكن تشتري صفارة وتعيش فيها دور الكابتن جودة أو شغل مع التمارين أي موسيقى حماسية تضيف حياة للموضوع بدل ما الموضوع يقلب بـحصة ألعاب مملة.
بلاش تختار تمارين صعبة، وحاول على قد ما تقدر أنك تبعد عن أي حاجة ممكن تسبب إصابات.
5 – أعملهم جلسة تصوير:
ده طبعًا لو عندك كاميرا وبـتحب التصوير، تقدر تروح تصورهم وتصور معهم.. وبالرغم من أن الاقتراح ده مش سهل زي الاقتراحات السابقة، لأنك أولًا لازم تجيب لهم الصور بعد ما تطبعها، ثانيًا لازم تصور كل واحد لوحده بجانب الصور الجماعية، إلا أن الاقتراح ده في رأينا ممكن يخلي الأطفال دي تفتكرك على طول، لأنهم للأسف ما عندهمش حد يهتم بأنه يحتفظ لهم بذكرياتهم في صورة، كمان ممكن تشتري كاميرا فورية سعرها أصبح رخيض حالياً، لو أنت وصلت للمرحلة دي من قراءة المقال فأكيد حسيت إننا مش عايزين نقلبها دراما، ولكن تخيل لو حتى طفل احتفظ بالصورة اللي أنت أخذتها له أو أخذتها معه لحد ما كبر.
6- اعمل فيها باتمان:
جوني ديب نفسه عملها لما لبس زي شخصية كابتن Jack Sparrow اللي قدمها في فيلم Pirates of the Caribbean وزار مستشفى للأطفال.. تقدر تشتري زي أي بطل خارق مشهور (باتمان – سوبرمان – سبيدرمان) من محلات زي ذا بارتي ستيشن – The Party Station وتوي & جوي – Toy & Joy، وتروح تبسطهم وتأخذ صديق لك يصورهم معاك… أهو منك تحس أنك بطل خارق بصحيح ولو ليوم واحد، ومنك تسعدهم.
7- أعمل لهم Movie Night:
كل اللي هـتحتاجه هو لاب توب وفيلم كارتون. دي بقى لا هـتعمل فيها لا باتمان ولا هـتضطر أنك ترسم أو تتكلم. بمجرد ما تشغل لهم الفيلم هـتلاقيهم ركزوا فيه. أهم حاجة تجيب فيلم لطيف ودمه خفيف وما يكونش فيه أي مشاهد عنيفة أو حزينة، تفكرهم بحالهم… ممكن تشتري أفلام بأسعر معقولة من كارفور أو هايبر وان.
تقدر كمان تستفسر عن إمكانية أنكم تعملوا فشار وتقعدوا تتفرجوا على الفيلم كلكوا سوا ، طبعًا اشتري الفشار وأنت رايح لهم.
8 – ارسمهم كاريكاتير:
نعترف أن الاقتراح ده مش أي حد يعرف يعمله، ده ممكن يناسب شباب فنون جميلة أو محترفي رسم الكاركاتير.. ننصحك أنك تبقى مع مجموعة كبيرة من الفنانين لأن واحد لوحده مش كفاية. نعتقد أنها هـتبقى تجربة جميلة وتدريب ببلاش كمان وبفائدة لك وللأطفال.. طبعًا مش هـنقول لمعشر أهل الفن يجيبوا إيه وهم رايحين، ما تنسوش أدواتكم (حاجة تسندوا عليها ورق وأقلام فلوماستر).
9 – اعمل لهم حفل موسيقي:
دي برضه لأصحاب المواهب الموسيقية، لو عندك فرقة موسيقية أو بـتعزف لوحدك على آلة، ممكن تروح تقعد تغني لهم شوية. ويا سلام لو ذاكرت مثلًا حبة أغاني للأطفال وعزفتها لهم، إن شاء الله حتى النشيد الوطني، هـتخرج كمية طاقة إيجابية منهم ومش بعيد تكتشف نجم المستقبل في واحد من الأطفال.
10- كلمهم عن نفسك:
عارفين أنها ممكن تكون فكرة مضحكة لناس كثير، بس في بلاد برة فيه يوم في المدرسة الناس بـتروح تحكي عن شغلهم للأطفال… يعني أنت مثلًا لو دكتور تقدر تروح تتكلم عن شغلك ببساطة وتحكي لهم أنت بـتعمل إيه وإيه فايدة عملك… وهكذا. بالرغم من أن الفكرة بالنسبة لك ممكن تبقى "واسعة" حبتين إلا أن الأطفال دي محتاجة مثل أعلى، شخص يكلمهم عن فائدة العمل ويشجعهم على النجاح والمحاولة.
الأفكار خلصت.. حاولنا على قد ما نقدر نقترح عليكم أبسط حاجة ممكن تعملوها للأطفال اللي محتاجين أي دقيقة اهتمام، ومهما واجهتم صعوبات في اليوم ده حافظوا على هدوؤكم واستمتعوا باللحظة معهم علشان اليوم ده بـيستنوه من السنة للسنة.. لو مش عارفين ممكن تروحوا فين تقدروا تبصوا هنا، ولو عايزين تحتفلوا بيوم اليتيم في إيفنت تابعوا أجندتنا هـنحاول نجيب أكبر عدد من الحفلات المخصصة لليوم ده.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
