يوم كامل في الزمالك بأقل من 500 جنيه؟ أيوه.. وهتنبسط كمان!
أماكن تصوير الزمالك القاهرة تمشية على النيل حدائق الزمالك خروجات رخيصة خروجة حلوة فن وطبيعة كافيهات مطاعم الزمالك
Cairo 360
رنا شرف
الصورة الرئيسية: Mohamed Ahmed
الزمالك من المناطق اللي ليها طابع خاص، راقية، تاريخية، ومليانة تفاصيل بتخليك تحس إنك في فيلم أبيض وأسود، خصوصًا لما تبص على المباني القديمة جنب الجديدة، والشوارع الهادية اللي لسه محافظة على سحرها.
كمان كتير من الشباب بيعتبروها خروجة أساسية في الشهر، لأنها ببساطة “فيها كل حاجة”: من كافيهات ومطاعم مميزة، لحد قعدة على النيل وتمشية ومعاها ذرة مشوي!
تعالوا نعيش يوم كامل في الزمالك، ونشوف نقدر نستمتع إزاي بميزانية مش هتزيد عن 500 جنيه.
الفطار: طبالي – طعم مصري أصيل
نبدأ يومنا بأحلى حاجة: الفطار. مطعم طبالي من الأماكن اللي بتقدم فطار مصري تقليدي حقيقي، والسعر كمان على قد الإيد.
ممكن تطلب سندوتش فول بـ50 جنيه وسندوتش طعمية بـ32 جنيه أو ممكن تطلب وجبة فول وطعمية وعيش، يعني فطار يشبعك ويفتح نفسك لليوم.
بعد الفطار: استمتع بالطبيعة في حديقة الحرية
نتمشى شوية ونهضم الفطار، ومالناش غير حديقة الحرية، واحدة من أجمل الحدائق في الزمالك.
رسم الدخول 20 جنيه بس، والمكان هادي ومليان تماثيل لفنانين عالميين كانوا موجودين في بلاد زي فنزويلا والإكوادور.
الحديقة مناسبة جدًا للتصوير، والجو هناك ممتع ومريح للأعصاب.
وقت الغدا: أولدش – أكلك العالمي في قلب الزمالك
دلوقتي جه وقت الغدا، وهنروح مطعم من المطاعم اللي بقت علامة في الزمالك: أولدش.
المكان بيقدم أكلات عالمية، وأسعاره حلوة جدًا. ممكن تطلب نص فرخة مع ورق عنب بـ273 جنيه، وتشرب حاجة ساقعة بـ55 جنيه.
أكل لذيذ وشبعان وميزانيتك لسه في الأمان.
الختام: تمشية على النيل وذرة مشوي
مش معقول نكون في الزمالك وما نعديش على شارع أبو الفدا! التمشية هناك على الكورنيش لها طعم تاني، وخصوصًا وقت الغروب.
هات ذرة مشوي أو كيس لب، واتمشى شوية وخد نفس عميق من هواء النيل.
وأخيرًا..
اليوم خلص، لكن طاقتك لسه مشحونة بالجمال والراحة، وفلوسك كمان لسه معاك!
خروجة بسيطة في الزمالك تقدر تبهجك وتفصلك عن دوشة اليوم، وكل ده بـ500 جنيه أو أقل.
