ويك إند مع الأجداد.. دليلك الكامل لزيارة القرية الفرعونية بالجيزة
الحضارة المصرية القرية الفرعونية خروجة ثقافية زيارة سياحية
Mohamed Talaat
الحياة في القاهرة مليانة خبرات وحكايات وقصص وحواديت كتير، ومن ضمن القصص الموجودة في القاهرة “القرية الفرعونية”، اللي هي عبارة عن مزار سياحي بيضم جواه نماذج من الحياة المصرية القديمة، ودي كانت فكرة الدكتور حسن رجب اللي نجح في تحويل جزيرة في حضن نهر النيل عند شارع البحر الأعظم بالجيزة لقرية شبيهة بحياة المصريين القدماء على مساحة 32 فدان وزرع حوالين الجزيرة 5000 شجرة بأنواع مختلفة علشان تكون حاجز بديل عن الأسوار.
في السطور الجاية هنعرفكم على كل الل محتاجينه من معلومات عن القرية الفرعونية.
تم افتتاح القرية الفرعونية عام 1984 بتكلفة بلغت 6 مليون دولار، وزي ما قلنا تم انشاءها على مساحة 32 فدان وفيها بيت بكل مشتملاته وسور وحديقة وحقل كبير. وتقدروا تزوروا القرية الفرعونية يوميًا من الساعة التاسعة صباحًا إلى الساعة الخامسة مساءً وبتفضل مفتوحة في الصيف حتى الساعة السابعة مساءً. وأسعار التذاكر بتبدأ من 60 جنيه للأطفال و350 جنيه للكبار شاملة وجبة، وسعر الجولة داخل القرية الفرعونية مع زيارة مقبرة توت عنخ آمون و5 متاحف 195 جنيه، ورحلة اليخت وزيارة مقبرة توت عنخ آمون بـ265 جنيه، وفي كل جولة داخل القرية هتلاقوا فيه مرشد سياحي بيوضح لكم كل المعلومات اللي ممكن تحتاجوا تعرفوها.
عند وصولكم لبوابة القرية الفرعونية هتدخلوا على عوامة الاستقبال وهتلاقوا فيها كافيه صغير ومتحف كليوباترا، وتقدروا تركبوا المركب العالق علشان تشوفوا القنوات المائية المحيطة بالقرية وهتعرفوا معلومات خلال الجولة عن آلهة القدماء المصريين ومشهد عن سيدنا موسى عليه السلام، وإزاي بيتم تحنيط الجثث، وطرق صناعة الفخار والزجاج، وطرق الزراعة والصيد والري لدى القدماء المصريين.
ولو معاكم أطفال تقدروا تزوروا ملاهي القرية اللي فيها ألعاب مختلفة وممتعة، وكمان لو حابين تتصوروا فعندهم مركز للتصوير بالملابس الفرعونية، ده غير السوق والبازار اللي بيبيعوا منتجات فرعونية وعطور ومنتجات زجاج ورسم حنة وغيرها، وطبعًا فيه مطاعم وكافيهات بتقدم أكل وشرب بأسعار مناسبة.
أما المتاحف الموجودة داخل القرية الفرعونية فتقدروا تشوفوا متحف الرئيس محمد نجيب، والرئيس جمال عبد الناصر، والرئيس السادات، ومتحف التحنيط والمتحف الإسلامي، والمتحف القبطي، ومتحف الأهرامات، ومتحف الحملة الفرنسية.
أما أجمل ما يميز القرية فهي مقبرة توت عنخ آمون اللي هي صورة طبق الأصل من المقبرة الأصلية في الحجم والتصميم، ومقسمة لـ4 غرف، وبتحتوي الغرف على ثلاثة أسرَّة مطلية بالذهب، إضافةً إلى طعام الملك والعديد من الأشياء الخاصة به، وتوجد أواني من الفخار بالإضافة إلى أسلحة الملك توت عنخ آمون ولعبة الشطرنج الخاصة به، وكمان فيه نماذج من المقبرة بتحتوي على أربع مقصورات، والمعروف أنها غرفة الدفن، ودي فيها تابوت مقلد بيشبه الأصلي اللي من الذهب الخالص.
العنوان: 3 شارع البحر الأعظم – الجيزة.
تقدروا تعرفوا أكتر عنهم من خلال صفحة الفيسبوك من هنا.
