وشوش قاهرية بعدسة محمود ندا
Omar Mossad
الأسطورة بتقول أن الحاجة اللي بنحبها عمر حبها مابيموت جوانا، بيفضل موجود وأول ما يلاقي فرصة والقيود تخف هنلاقينا مسحوبين للمساحة اللي المفروض نكون فيها، ونفوق على رجلينا بتدب في أرض الأحلام القديمة.
محمود ندا الشاب العشريني خريج قسم الـ “ميكاترونيكس” بكلية الهندسة فاق مؤخرًا على صوت ندّاهة الحب الأول بعد ظروف كتير تضافرت علشان تلغي من حياته كل الأصوات اللي كانت عاملة تشويش وتبرز صوت النداهة بوضوح، الأمر اللي عادةً مابنشوفهوش إحنا كجمهور غير على هيئة تغير حاد في مسار الحياة مجهول السبب، التغير اللي بتصحبه تطورات سريعة جدًا في مساحات بعينها، تخلينا نستغرب أد ما نستغرب، لكن يفضل الموضوع حلو بغرابته.
الحب الأول لـ “ندا” اللي اتكلمنا عنه يطلع: الكاميرا، والصورة.. القالب الوحيد القادر على حبس الزمن لو أجاد صاحبه تشكيله، وأحسن شحنه بالمعالم المادية والشعورية اللي تخليك لما تسرح في الصورة بعدين تعيش جواها، ويكأنها آلة زمن بتسحبك لوقتها وأحداثها المحيطة مع كل نظرة.
مؤخرًا نشر “ندا” على حسابه الشخصي على فيسبوك ألبوم صور اعتبرها أفضل صوره في 2016، السنة اللي بتمثل عمره في مجال التصوير، وقال عنها: “كل صورة حلوة بتمثل لي سعادة كبيرة -جنب السعادة بحلاوتها- أني أنا اللي مصورها”.. الألبوم اللي لاقى إعجاب وإشادة كبيرة من الأصدقاء بالإضافة للمهتمين بمجال التصوير أو بعض الأسماء الشابة القوية في الوسط.
اخترنا لكم من الألبوم ده خمس بورتريهات منوعة لوشوش قاهرية مميزة، تقدروا تاخدوا من خلالها جولة سريعة في طبائع أهل القاهرة المختلفة وهمومهم المتباينة، يللا بينا.
(عم محمد – 87 سنة – الدرب الأحمر)
(من جزيرة الدهب)
(شارع أمير الجيوش – المعز)
(جاردن سيتي)
(سيدة من الطريقة الرفاعية – من مولد الست فاطمة النبوية)
