The Definitive Guide to Living in the Capital , Cairo , Egypt

القاهرة بيحصل فيها مؤخرًا مشاريع مهمة جدًا، بتدينا أمل كبير إن العاصمة اللي عانت من الإهمال لسنوات طويلة راجعة تنور من تاني والتحضر والتقدم يكونوا شعارها، ومن المشاريع المهمة اللي بتحصل مؤخرًا في القاهرة، مشروع “بسكلتة” اللي اللي بتقوم بتنفيذه محافظة القاهرة، وبيتضمن إنشاء مسارات للدراجات (العجل) بوسط القاهرة.. تعالوا نتعرف على المشروع العظيم ده.

الهدف من “بسكلتة” هو تشغيل 600 عجلة في وسط القاهرة، من خلال 30 محطة ثابتة هيتم توزيعها على شوارع منطقة وسط البلد، ضمن خطة تقليل الازدحام في المنطقة دي، وهتكون “العجلة” هي وسيلة المواصلات البديلة للعربيات والأتوبيسات للتنقل في شوارع وسط القاهرة.

ومؤخرًا قامت محافظة القاهرة بعدد من التجارب العملية بالتنسيق والتعاون بين الإدارة العامة للمرور ومديرية الطرق، لرسم المسارات الخاصة بالعجل بعرض 1.7 متر، وتم بدء تحديد المسارات في المرحلة الأولى واللي هتكون في شوارع محمد فريد وطلعت حرب وقصر النيل ومصطفى كامل و 26 يوليو بطول 2 كم، وهيتم إنشاء 30 محطة هتضم 600 عجلة بتكلفة 1.5 مليون دولار (يعادل 25 مليون جنيه مصري تقريبًا).

 وبحسب تصريحات إعلامية نشرها موقع اليوم السابع نقلًا عن المهندس خليل شعث، أحد المسئولين عن تنفيذ المشروع، ورئيس وحدة تطوير العشوائيات بمحافظة القاهرة، فحاليًا جاري توريد الدراجات الخاصة بالمشروع، وتم تحديد المحطات اللي هيتم توزيعها على شوارع منطقة وسط البلد، وأضاف إن منظومة الدراجات هتشتغل بأبلكيشن موبايل، علشان يعرف المواطن بسهولة أماكن الدراجات والمسار الخاص بيها.

 والمشروع ده بيتم تمويله من خلال برنامج الأمم المتحدة للمستوطنات البشرية، بقيمة 1.5 مليون دولار، وتم بالفعل العمل في المشروع من خلال المقاول لتنفيذ المسارات اللي تم تخطيطها بالتنسيق مع المرور علشان ما تحصلش أزمات مرورية.

وتم تحديد المسارات وأماكن المحطات بناء على عوامل الجذب الموجودة فى المنطقة زي: محطات المترو، والمتاحف، والمعارض، وغيرها من الأماكن اللي بيتردد عليها المواطنين أكثر من غيرها، ومسار الدراجات هيكون اتجاهين وهيتم تحديده بواسطة فواصل هتحمي سائقي الدراجات وهيتم منع العربيات من الركن في الأماكن دي.

 وعن احتمال سرقة العجل، وضح المهندس خليل شعث، إن العجلة الجاري توريدها للقاهرة مزودة بنظام خاصية التتبع “جي بي إس” لمنع سرقتها ومعرفة مكانها، كمان الراكب هيحصل على كارت ذكي من الشركة المنفذة مُسجل فيه كل بياناته بهدف احتساب مسافة ركوب العجلة بداية من التحرك من المحطة ولحد تسليمها فى أقرب محطة للمكان المستهدف الوصول إليه وهيتم احتساب التكلفة والخصم من رصيده المدفوع مقدمًا، كمان هيتم تعيين أفراد أمن على محطات الدرجات.