وسط أجواء الخريف.. 5 حدائق في القاهرة فيهم أنشطة للكبار والصغار
أفضل الخروجات أفضل حديقة حدائق القاهرة خروجات في الحدائق خروجة على النيل
Mohamed Talaat
الأجواء الحالية تحت سماء القاهرة بتدينا نسمة هواء منعشة افتقدناها في أيام الصيف الحار، وده بيشجعنا نخرج في الهواء الطلق وسط الخضرة الممتعة في أجواء القاهرة الجميلة، وعلشان كده هنقول لكم على 5 حدائق تقدروا تستمتعوا فيها بأجواء الخريف الممتعة مع العائلة والأصدقاء والمعارف.
حديقة الأسماك
من علامات حي الزمالك التاريخية. اتبنت أيام الخديو اسماعيل وفيها أشجار نادرة والتمشية في حضنها حكاية، وتعتبر من ضمن أجمل حدائق القاهرة، وبتحتوي على كيدز إيريا وجبلاية أسماك ومقاعد وبيقام فيها فعاليات كتير مختلفة.
العنوان: شارع الجبلاية – الزمالك.
حديقة الأزهر
لو بنتكلم عن أجواء وسط الخضرة يبقى لازم نتكلم عن حديقة الأزهر اللي هي أكبر حديقة عامة في القاهرة، ومنها هتشوفوا القاهرة الفاطمية والخديوية من فوق، وجواها هتلاقوا نباتات مختلفة نادرة ومميزة ومنطقة مطاعم وكيدز إيريا وغيرها من أجواء المرح، ونصيحتنا أن الزيارة لازم تكون مع مجموعة مش فرد لوحده.
العنوان: 10 شارع صلاح سالم – الدرب الأحمر.
حديقة أم كلثوم
على النيل مباشرة هتلاقوا حديقة أم كلثوم في انتظاركم! واللي بتتمتع بمنظر خلاب ومميز وجو هادي وشاعري وسط مجموعة من الأشجار والنباتات المختلفة، وتعتبر من أجمل حدائق المنيل.
العنوان: شارع عبد العزيز آل سعود أمام مستشفى المنيل الجامعي.
الحديقة الدولية
في شرق القاهرة هتلاقوا خروجة حلوة جوا الحديقة الدولية واللي مساحتها كبيرة وفيها أنشطة كتير أهمها الكيدز إيريا وحديقة الحيوان المصغرة، وجواها هتلاقوا مجسمات وأماكن للقعدة وكافيهات ومطاعم وغيرها.
العنوان: آخر شارع عباس العقاد – مدينة نصر.
جزيرة المعادي
طالما بنتكلم عن الخروجات يبقى لازم نرشح لكم جزيرة المعادي، واللي هي واحدة من أجمل الحدائق على النيل واللي فيها خدمات كتير مميزة وأنشطة مناسبة للكبار والصغار.
العنوان: كورنيش المعادي – أمام مستشفى المعادي العسكري.
مقترح
أفلام
لسهرة هالوين ماتتنسيش.. 10 أعمال أجنبية وعربية مرعبة
افلام افلام تشوفها في الهالوين +6
الحياة في كايرو
