وداعًا للطوابير… ماكينات آلية لبيع تذاكر المترو قريبًا
الفكة المترو تحت الأرض تذاكر تكنولوجيا زحمة شباك شراء تذاكر ماكينات آلية لتذاكر المترو ماكينات فكة مترو الأنفاق مترو القاهرة
Cairo 360
الطوابير والزحمة مشكلة كبيرة بتواجه كتير من سكان القاهرة وهم بيشتروا تذاكر المترو، لكن المشكلة دي في طريقها للحل قريب جدًا.. علشان هيبقى فيه ماكينات آلية لبيع التذاكر.
مؤخرًا نسَّقت وزارة المالية مع وزارة النقل وهيئة مترو الأنفاق، بالتواصل مع إحدى الشركات الدولية المتخصصة لتوريد ماكينات لاستخراج تذاكر المترو للجمهور بمحطات المترو الرئيسية، حاجة كده زي الماكينات اللي موجودة في دول العالم المتقدمة، كمان هتسمح الماكينات برد باقي المبلغ (الفكة) للمواطنين في حالة إنك تدخل مبلغ أكبر من قيمة التذكرة.
السبب في التفكير في الموضوع ده هو التيسير على المواطنين ومنع التكدس والتزاحم للمواطنين على شباك التذاكر.
وأكدت وزارة المالية في بيان أصدرته يوم الأربعاء أنها بعتت أكتر من نوع من أنواع تذاكر المترو لإجراء عمليات الاختبارات على ماكينة التذاكر الإلكترونية بمقر الشركة في الخارج واللي أثبتت فاعليتها بنجاح تمهيدًا للتعاقد على عدد أكبر من الماكينات دي واللي هيتم تركيبها قريب في المحطات الرئيسية للمترو.
الوزارة أكدت أنها علشان توفر كمان الفكة المستخدمة في استخراج تذاكر المترو هيتم توريد ماكينات صراف آلي تانية هتتيح للمواطنين الحصول على العملات الفكة بسعة تخزينية عالية خلال الفترة الجاية، وده بعد نجاح تجربة توفير ماكينة لتوفير العملات الفكة خلال الشهر اللي فات في محطة مترو الشهداء.
ومن المتوقع وصول الماكينتين قبل نهاية السنة دي للبدء في إجراء الاختبارات اللازمة عليها بمعرفة الجهات المعنية المختصة للوقوف على مدى قدرتها التشغيلية للاستخدام.
وهيتم تعميم الماكينات دي في غالبية محطات المترو.
