The Definitive Guide to Living in the Capital , Cairo , Egypt

صحيح الجو اليومين دول متقلب، لكن على مين، لسعة البرد الخفيف بالليل في القاهرة بتدي إحساس رومانسي رايق، ولو كنتم من محبي الشتاء كمان يبقى الموضوع ده علشانكم، وهنقولكم فيه على خروجة ببلاش، وجو منعش، وأجواء رومانسية، وفيو النيل كمان، وكلمة السر هي “كباري القاهرة”.

كباري القاهرة، هتشوفوا عليها ناس بتغني وشباب بيفرح، وقعدات سمر حلوة، وهزار وضحك، وممكن تسيبوا كل ده وتقفوا تستمتعوا بنسمة الهواء اللي عالنيل دي، عارفينها طبعًا:

كوبري قصر النيل:

أشهر كوبري في مصر، زفة تلاقي، رقص ومغنى تلاقي، ترمس وورد تلاقي، كله موجود، بس انتوا اتبسطوا، أول الكوبري وآخره فيه تماثيل لأسود معروفة بأسود قصر النيل، وملناش دعوة بتاريخهم، بس احنا بنقولكم اتصوروا معاهم صورة حلوة واحتفظوا بيها للذكرى.

كوبري الجامعة:

هادي عن غيره، وممكن تقعدوا تاكلوا حلبسة “حمص الشام” أو تشربوا شاي، بس اتفقوا على أسعارهم الأول، ولو معجبكوش السعر قولوا ميلزمناش، مش عيب.

كوبري عباس:

على كوبري عباس، ماشية وماشية الناس، وهنا بقى تكمن الهيصة والظيطة والدوشة والزحمة والضحك والروقان والمواقف المحرجة والبايخة، بس أهم حاجة فيه، جدعنة المصريين اللي بتظهر فيه دايمًا.

كوبري أكتوبر:

طبعًا جه في بالكم الوقفة والزحمة، بس احنا هنا هنطلب منكم تسيبوا العربية وتمشوا على رجليكم من التحرير للزمالك على كوبري أكتوبر وانتوا هايمين في غرام النيل، التمشية دي هتصفي الذهن وهتخليكم متشعلقين في حب الدنيا، ريحة النيل من فوق الكوبري بتطلع مع نسمة الهواء الحلوة، فمتقلقش لو كنت لوحدك، علشان النيل هيبقى ونيسك.