هتعمل إيه في عيد الحب لو كنت سنجل؟ تروح تغني مع داليا يونس في حفل الفلانتين طبعًا!
عيد الحب، سنجل، حفلات
Cairo 360
عيد الحب فرصة كبيرة للمحبين للتعبير عن مشاعرهم، لكن إيه أخبار السناجل؟ الأكيد إنك تكون وحيد من غير حد تحتفل معاه باليوم ده شيء ممكن يضايق ناس كتيير، ومن هنا ظهرت فكرة ليلة للسناجل اللي عملتها داليا يونس السنة اللي فاتت ونجحت، وبتكررها تاني السنة دي في مكان مختلف هو رووم. ولو عاوزين تعرفوا أكثر عن داليا ممكن تشوفوا موضوع كايرو360 عنها هنا.
داليا يونس هتغني أغاني بالعربي بتوصف كل المراحل اللي بيعيشها الشخص غير المرتبط، وهتخليكم تستمتعوا باليوم بره جو الدباديب والورود واللون الأحمر الفاقع اللي بيزغلل طول اليوم.
والهدف من الإيفنت لا هو الندب ععلى الحال ولا السفّ على المرتبطين، لكن داليا بتحاول توصل رسالة “إن سعادتك وانبساطك بالحياة المفروض مايتحددوش حسب حالتك الارتباطية، وإن ماينفعش نحكم أو نصنف الناس على أساس حالتهم الاجتماعية”.
والإيفنت هو “مرفأ آمن للجميع من طوفان مشاعر الفالانتاين” على حد تعبير داليا، والميعاد هيكون يوم الخميس 15 فبراير الساعة 9 في رووم في وسط البلد، وكل تفاصيله هتلاقوها هنا.
