The Definitive Guide to Living in the Capital , Cairo , Egypt

رمضان شهر الخير، اللي بنستناه من السنة للسنة، أيام البركة واللمة عند السحور والفطار والكنافة اللي بنكتشف كل سنة أنه ممكن يتم استخدامها وخلطها بحاجة جديدة. بس الأكيد إن زينة رمضان والفانوس من المعالم الرئيسية اللي ما فيش حد يقدر يستغنى عنهم خصوصًا لو هتشتري فانوس هدية لحد عزيز عليك.

شراء الهدايا فن مش كل الناس بتتقنه، لأن كل شخصية من اللي حواليك لهم نوع فانوس معين يناسبهم، ممكن لو اتلخبطت تتفهم غلط وبدل ما تبسط اللي قدامك يتضايق أو يفتكر أنك مهتم زيادة عن اللزوم.

بس الأول لازم تعرف أكتر الأماكن اللي ممكن تشتري منها كل أنواع الفوانيس تقريبًا بأسعار مناسبة، وده بيكون متوفر في مكانين طبعًا بجوار مسجد السيدة زينب، وفي شارع المعز لدين الله الفاطمي، غير الخيم اللي بتتنصب مخصوص في كل مكان بس إحنا بنرشح المكانين دول بقوة.

النبي قبل الهدية

طبعًا أنك تشتري لحد هدية قيمة تعبر له بيها عن مشاعرك واهتمامك ده في حد ذاته شعور نبيل، خصوصًا لو كنتم مخطوبين مثلًا أو متجوزين، شراء الفانوس في بداية رمضان يعتبر من أكثر الحاجات اللي ممكن تفرح الشخص اللي قدامك خاصة لو بنت، بس خلي بالك أنك لو جبته غلط ممكن جدًا الهدية تكون سبب خناقة كبيرة ماكنش ليها أي لازمة.

الفانوس لحد أنت بتحبه لازم يكون فيه لمسة فنية، يكون شكله حلو مش رخيص أو بلاستيك وبيعمل صوت زي اللي بيتجاب للأطفال، لأ يفضل يكون فيه زجاج ملون يعمل شكل مميز لما ينور، ويكون معمول بحرفية وفن تبين أن شكله قيم ويدل على اهتمام الشخص باللي بيحبه.

كمان ظهرت فكرة جديدة من كم سنة وهي Box  رمضان، عبارة عن فانوس شكله حلو وعروسة بوجي أو طمطم مثلًا، مع حبة أنواع شوكولاتة على ذوقك، مع مصحف مثلًا أو سجادة صلاة أو أجندة to-do والتكلفة بتعتمد على كم المبلغ اللي مستعد تدفعه، بس لو أنت عاوز تقتصد شوية ممكن تعمله بنفسك في البيت وتشتري كل حاجة لوحدها وبعدين تحطهم في الصندوق ده أو الـ Box. وخلي بالك إن المكان اللي هتشتري منه الصندوق ده لازم تكون جودة الحاجة عنده كويسة وإلا هيتفهم إنك بتسترخص وهيبقى شكلك وحش جدًا.

الأقربون أولى بالمعروف

مش معنى إن أهلك بيحبوك حب غير مشروط وبيدعموك أنك ماتفرحهمش بفانوس جميل، وده ليك خيارين يا إما تجيب فانوس كبير للبيت وزينة، أو تجيب لكل فرد من العيلة فانوس صغير على حسب شخصية كل حد فيهم واللي يفرحه أكتر. وطبعًا الأخ أو الأخت ما يتنسوش دول هم سندك في البيت. والجيران برضه ولو حتى بزينة رمضان تتشاركوا الفرحة سوا.

صاحبي اللي كتفه في كتفي

الصحاب من أجمل النعم اللي ربنا بينعم بيهم على الشخص، ومافيهاش حاجة لو عاوز تفرح حد من أصحابك أنك تختار له هدية مناسبة تفكره بيك. ولو أنت معاك فلوس أو مش معاك  بس عاوز تسعد غيرك فأحسن أنك تختار فانوس قيم، ممكن يكون حجمه صغير اللي قد الإيد بس ملون ومعمول بعناية، وممكن برضه المخدات الصغيرة اللي معمولة بقماش الخيامية، برضه زملائك في الشغل ممكن تشتري لهم الفوانيس الصغيرة المادليات سعرها مش بيكون غالي وتبقى فرحت عدد كبير عندك في الشغل.

حماتي نعمة حياتي

لو عاوز تكسب ود حماتك ممكن تشوف أكتر حاجة بتحبها إيه وتعمل لها صندوق معتبر كده فيه الحاجات اللي هي بتحبها سواء مفرش شكله شيك أو صينية ملونة مع فانوس كبير، وتبقى فرحتها وضمنت إن الشهر يعدي بسلام، بس ماتنساش تجيب واحد زيه لمامتك علشان الموضوع ما يقلبش منك دراما.

وكل سنة وأنتم طيبين