نصائح مهمة لسلامتك أثناء قيادة عربيتك تحت المطر
الأمطار في مصر الطقس في القاهرة قيادة السيارات تحت المطر قيادة السيارات في الشتاء نصائح للقيادة تحت المطر نصائح للقيادة خلال السيول
Mohamed Talaat
القاهرة بتمر بطقس غير مستقر الفترة دي، وبتحتاج قيادة العربيات تحت المطر، خصوصًا لو كان مطر غزير، لحالة خاصة من التركيز والحذر، في الموضوع ده هنعرفكم على نصائح عملية مهمة لتجنب الوقوع في الحوادث أثناء القيادة تحت المطر.
1 – ابعد عن كل شئ ممكن يلهيك أو يشتت انتباهك زي التليفون المحمول أو الاستماع للراديو خلال قيادة العربية تحت المطر وركز في الطريق وبس.
2 – خلي إيديك الاتنين على الدركسيون (المقود) في جميع الأوقات.
3 – خلي المصابيح الأمامية لعربيتك منورة حتى في وضح النهار، لإن ده هيمكنك من الرؤية وكمان هيخلي اللي جاي قدامك يشوفك بشكل أسهل.
4 – لازم تحافظ على مسافة الأمان بينك وبين العربية اللي قدامك.
5 – من المهم تخفيض السرعة خلال القيادة تحت المطر، لأن ده بيسمح لك تكون مرتاح وتقدر تشوف كل اللي بيحصل في الطريق قدامك.
6 – مهم الحرص على عدم القيادة في الطرق المغمورة بالمياه، ولو ماعندكش أي خيارات فلازم تاخد بالك وتحاول تتبع سير السيارات اللي قدامك بهدوء علشان تقدر تحكم على عمق المياه.
7 – بلاش تتحرك بالعربية غير بعد إزالة الضباب الداخلي من على زجاج عربيتك.
8 – مهم تحرص على إزالة الماء المتراكم على الزجاج الجانبي وعلى المرايا الخارجية اللي صعب إزالته من خلال المساحات، وده هيساعدك على الرؤية بشكل أوضح.
9 – لازم تتأكد من حالة إطارات العربية أول بأول.
وأخيرًا..
فريق كايرو 360 بيتمنى لكم كل السلامة على الطريق.
