The Definitive Guide to Living in the Capital , Cairo , Egypt

بعد إغلاق حديقة حيوان الجيزة الأشهر في مصر والمنطقة العربية للتطوير، بقينا مشتاقين لأماكن فيها حيوانات ونروح لها علشان نتصور معاها ونلعب، وده فتح المجال لأماكن كتير أنها تطور من نفسها علشان يجذبوا أهل القاهرة وزوارها، والنهاردة هنتكلم عن حديقة حيوان مختلفة لأنها موجودة وسط نيل القاهرة، وكمان بيشتغلوا بالليل وده بيدي فرصة أكبر للناس أنها تلاقى خروجة مميزة في ليالي الصيف المنعشة.

المكان اسمه Nile Zoo وهو موجود على جزيرة في نيل المعادي وعلشان تروحوها لازم تاخدوا مركب توصلكم لحد هناك، وده بيكون ضمن سعر التذكرة اللي بـ150 جنيه، وكمان بيشملها دخول الكيدز إيريا والحديقة وهتاخدوا كمان أكل للحيوانات، ولكل اللي سنهم أقل من 4 سنوات الدخول مجانًا.

الحديقة فيها مجموعة من الحيوانات المحببة لينا زي “الطاووس – الغزال – البجع – النعام – الحصان – البط – العصافير – البغبغان – الصقر – اللاما– الزواحف – الجديان – الوز”، وغيرها من الحيوانات الأوروبية اللي هتستمتعوا باللعب معاها ومشاركتها الأكل.

وكمان بيعملوا ورش فنية للأطفال، وعندهم مطعم ايطالي وكمان بيسمحوا بدخول الأكل، والمميز في Nile Zoo أنهم بيشتغلوا من الساعة 4 عصرًا حتى الساعة 12 منتصف الليل، وده بيديكم فرصة أنكم تخرجوا بعد شغلكم ومايبقاش لازم يوم إجازة، وتقدروا تاخدوا المركب الخاصة بيهم من المرسى الموجود قدام مستشفى النيل بدراوي على كورنيش المعادي.

تقدروا تعرفوا أكتر عنهم من خلال صفحة الفيسبوك من هنا.