The Definitive Guide to Living in the Capital , Cairo , Egypt

المخبوزات لها جمهور مُخلص، بيحبوا كل حاجة بتتخبز، سواء كانت كيك، باتيه، كرواسون، أي مخبوزات تكون فيها طعم وريحة الجودة، وده لطيف طبعًا، طيب لو المخبوزات دي كمان خفيفة، وعجينتها مش تقيلة؟ أكيد السعادة هتزيد! ده اللي لقيناه في المخبز الأوزبكي، اللي بيقدم عيش وكرواسون وكب كيك وغيرهم.

خلال السطور الجاية هنقول لكم على كل اللي محتاجين تعرفوه عن أشهر مكان أوزباكستاني في القاهرة، المعروف باسم المخبز الأوزبكي، أو مخبز لذيذ، وأجمل حاجة فيه إنه مشروع طموح لطلبة مجتهدين من جامعة الأزهر.

أولًا، المكان مجرد مخبز مافيهوش أي قعدة، وللأسف كمان ماعندهمش دليفري، وهو عليه يافطة بتقول إن المخبز اسمه “لذيذ”، ولكن هو مشهور جدًا بالمخبز الأوزبكي. هناك هتقدروا تستمتعوا بالعيش وهو بيتخبز عندهم، وأصحاب المطعم هما طلبة في جامعة الأزهر، وتعاملهم بشوش وهادي.

جربنا من عندهم العيش الأوزبكي، وكان سعره 7 جنيه، وحجمه ضخم شوية زي العيش الشمسي بتاع الصعيد، ورغم ضخامته إلا أنه خفيف في الأكل، وكمان جربنا من عندهم عيش تميس وسعر الرغيف 8 جنيه، هو أقل سماكة بكتير عن العيش الأوزباكي ولكن يعيبه أنه بينشف بسرعة وبردوا خفيف ويفضل تاكلوه في وقتها ميبقاش بايت.

وكمان جربنا من عندهم سمبوسك فراخ سعرها 15 جنيه، وحجمها متوسط، وهي متتاكلش هي تتذوق بمتعة وجمال، وكانت سخنة لما أكلناها، ده غير أن عندهم سمبوسك لحمة سعرها 20 جنيه، وهي كبيرة جدًا، لكن رغم عجينتها الخفيفة والحلوة إلا أن طعم اللحمة ماكنش الأفضل، خاصة أن كمية البصل جواها كتير جدًا.

وبيعملوا كمان كب كيك علبة فيها 4 قطع بسعر 20 جنيه، وطبعًا هي صحية وطعمها تحفة وسكرها خفيف ورغم كده تتاكل بحب، وكمان عندهم ميني كرواسون شيكولاته العلبة 5 قطع بسعر 20 جنيه.

المخبوزات في المجمل عظيمة، وخفيفة جدًا وتنفع وجبة فطار أو عشاء، والسبمبوسك ممكن تكون وجبة غذاء، والناس اللي هناك رغم أنهم مش بيتكلموا عربي أو إنجليزي كويس إلا أنهم بيجاهدوا في أنهم يوصلوا لكم المعلومة كاملة.

تقدروا تعرفوا أكتر عنهم من خلال صفحة الفيسبوك من هنا.