The Definitive Guide to Living in the Capital , Cairo , Egypt

محافظة القاهرة بتدرس مؤخرًا فكرة إنشاء مدينة تجارية شاملة، تنقل فيها الأنشطة التجارية. وده علشان تحد من الأزدحام في منطقة وسط البلد. ومناطق تانية زي: العتبة – الموسكي – الأزبكية – باب الشعرية – السيدة زينب – حي غرب وغيرهم.

المنطقة دي حسب ما ذكر موقع “الوطن” هتكون على مساحة كبيرة على الطريق الدائري الإقليمي. المتقاطع مع طريق القطامية العين السخنة. وكل حرفة أو صناعة هيكون لها مكان مخصص. ومكان تاني للباعة الجائلين. مع توفير مواصلات تربط بين المدينة، وكل الأماكن في القاهرة.

المدينة التجارية دي هتستوعب كل الأنشطة التجارية الموجودة في القاهرة من محلات الأخشاب والأقمشة بالناصرية والأزهر والأجهزة الكهربائية والمحمول فى شارع عبدالعزيز والمنسوجات فى الغورية والأدوات المنزلية فى حمام الثلاثاء والمشغولات فى خان الخليلى والأدوات المكتبية فى الفجالة وتجارة الخردة فى السبتية وخلافه.

الخطوة دي مش بس هتساهم في الحد من الزحمة في قلب العاصمة، دي كمان هتمنع مشكلات ومخالفات كتيرة. زي تحويل الوحدات السكنية لتجارية، وتحايل أصحاب المحلات والمخازن والورش على القانون. بالإضافة لحدوث حرائق بسبب غياب وسائل الأمان والحماية.

ومحافظة القاهرة بتقول إنها تلقت كتير من شكاوى المواطنين من تعرضهم للإزعاج بسبب وجود محلات وورش تحت العمارات اللي ساكنين فيها، وإشغال الشوارع من المحلات دي، علشان كده هيتم اتخاذ خطوات ترجع الوجه الحضارى للعاصمة وتبقى بتحتوي بس على الوحدات السكنية، وأى مشروعات تجارية يتم نقلها خارج الحيز العمرانى.