The Definitive Guide to Living in the Capital , Cairo , Egypt

التلوث مشكلة كبيرة في القاهرة، دي حقيقة ماحدش يقدر ينكرها، ورغم المحاولات الحكومية الجادة اللي بتحصل مؤخرًا للحد من المشكلة دي ومنها تطوير أتوبيسات العام كمثال، لكننا لسة -كسكان للعاصمة- بنحس إن المشكلة أقرب للكابوس، لكن فيه حاجة إيجابية هتحصل قريب في القاهرة، وهي وجود خطة طموحة لزارة البيئة هدفها إنقاذ القاهرة من كل مشاكل التلوث.. تعالوا نعرف تفاصيل الخطة دي من خلال 4 معلومات فيهم الخلاصة.

1 – من ساعات، كشفت الدكتورة ياسمين فؤاد، وزيرة البيئة، إن الوزارة بدأت فى إعداد مشروع البنك الدولى الخاص بإدارة نوعية الهواء وتغير المناخ في القاهرة الكبرى، وأكدت وصول محطات رصد نوعية الهواء المحيط لـ 109 محطة على مستوى محافظات الجمهورية، ومنهم طبعًا محافظة القاهرة.

2 – الوزيرة أكدت كمان أنه تم ربط 373 مدخنة فى 80 منشأة صناعية ومحطة كهرباء بالشبكة القومية لرصد الانبعاثات الصناعية، وبالطريقة دي هيتم توفير بيانات للمواطن بنوعية الهواء في المناطق المختلفة، زي ما بيحصل في باقي دول العالم.

3 – وبخصوص مشكلة المخلفات بالقاهرة الكبرى، أكدت الوزيرة إنه تم تخصيص 26 فدان بالعاشر من رمضان كمجمع متكامل لجميع أنواع المخلفات من القاهرة الكبرى سواء مدافن أو معالجة وتدوير، وهيتم إدارة المجمع ده عن طريق القطاع الخاص.

4 – وبالنسبة لمجال النقل في القاهرة الكبرى، أكدت الدكتورة ياسمين فؤاد إنه هيتم تأهيل هيئة النقل العام وتوفير أتوبيسات تشتغل بالكهرباء.

نتمنى نشوف القاهرة خالية بشكل تام من كل أشكال التلوث قريبًا بإذن الله!