The Definitive Guide to Living in the Capital , Cairo , Egypt

القاهرة أصبح فيها طفرة حقيقية في أتوبيسات النقل العام، اللي أصبحت نظيفة، ومكيفة، وبتغطي أماكن كتير في القاهرة بعضها بعيد عن محطات مترو الأنفاق.. وفي الساعات الأخيرة، استقبلت شوارع العاصمة المصرية، 20 أتوبيس مكيف جديد، بتغطي مناطق متنوعة.

وبحسب ما أعلنته هيئة النقل العام بالقاهرة، هيتم تشغيل الأتوبيسات الجديدة على 3 خطوط رئيسية.

– الخط الأول:

هيبدأ من “محطة مساكن بيتشو – شارع زهراء المعادي – طريق المعادي – نفق زهراء المعادي – شارع 306 – شارع السعودية – شارع الجزائر – ميدان العرب – شارع 77 – كوبري شمال المعادي – شارع كورنيش النيل – شارع الروضة – شارع المنيل – شارع السراي – كوبري الجامعة – جامعة القاهرة – شارع الدقي – شارع التحرير – شارع السودان – محطة بولاق الدكرور”.

– الخط الثاني:

هيبدأ من “محطة الأميرية – شارع السواح – شارع المطرية – ميدان المطرية – شارع الحكم – شارع أبو بكر الصديق- شارع النزهة – ميدان السبع عمارات – ميدان الساعة – عباس العقاد – شارع مصطفى النحاس- التبة – شارع متولي الشعراوي – الحي العاشر – زهراء مدينة نصر- الطريق الدائري – كوبري المشير – شارع التسعين – الجامعة الأمريكية”.

– الخط الثالث:

هيبدأ الخط الثالث من “النزهة الجديدة – شارع جسر السويس – الألف مسكن -شارع فريد سميكة – ميدان الحجاز -شارع النزهة – ميدان السبع عمارات – شارع عمر بن الخطاب – شارع الثورة – طريق القاهرة السويس – عزبة الهجانة – الطريق الدائري – زهراء مدينة نصر – كوبري المشير – شارع التسعين -ينتهي بالجامعة الأمريكية.

مواصفات الأتوبيسات الجديدة وسعر التذكرة

فريق كايرو 360 تواصل مع هيئة النقل العام بالقاهرة، وعرفنا منهم إن الـ ٢٠ أتوبيس كلهم مكيفين، وشغالين بالغاز الطبيعي، وكل أتوبيس منهم بيتكون من 33 كرسي، وفيه أماكن لوضع الحقائب، والأتوبيسات دي بتوفر أكثر من نصف سعر الوقود اللي بيستهلكه الأتوبيس العادي.

كمان بيتمتع الأتوبيس الجديد، بخاصية القدرة على الانخفاض والارتفاع، علشان يقدر الركاب يركبوه بكل سهولة، بالإضافة إلى أنه مزود بوسائل مساعدة لتسهيل صعود أصحاب الهمم بالكرسي المتحرك.

أما سعر التذكرة فهيكون 5 جنيه لنصف الخط، و10 جنيه للرحلة كاملة أو أزيد من نصف الخط.