The Definitive Guide to Living in the Capital , Cairo , Egypt

عارفين يعني إيه قطة أو كلب يكونوا عايشين في بيت وأصحاب البيت يقرروا يطردوهم لأي سبب؟ طيب عارفين يعني إيه قط أو كلب يفقد البصر ويبقى كفيف لأي سبب ويضطر يعيش في الشارع؟ طيب إيه اللي بـ يحصل لما عربية تخبط كلب أو قطة وتدوس على رجلهم وتخليهم معاقين للأبد؟ كثير بـ نشوف حالات صعبة لحيوانات في الشارع وبـ نحس  بحزن وعجز، وما بـ نعرفش نعمل إيه! الموضوع ده بقى هو الحل.

كلنا عارفين أن فيه ملاجئ للبني آدمين، لكن حد عمره سمع عن ملاجئ للحيوانات؟ أيوه.. فيه ملاجئ لهم، الملاجئ دي وظيفتها تستقبل الحالات الصعبة، طبعًا مصر فيها كميات مهولة من القطط والكلاب، كلنا بـ نتمنى أنهم يرتاحوا من الظروف الصعبة اللي بـ يعيشوها في الشارع وسط مخاطر الدهس بواسطة العربيات، أو الجوع والأمراض والجروح اللي بـ يتعرضوا لها باستمرار، لكن طبعًا مافيش مكان ممكن يستوعب كل الكميات دي، لذلك اللجوء للملاجئ بـ يكون في الحالات الصعبة اللي مش ممكن تقدر تعيش في الشارع.

لو لاقيت كلب أو قطة في حالة صعبة، ممكن تتصل بالملاجئ دي تساعدك في نقل الحيوان، أو يقولوا لك تعمل إيه لحد أما يوصل لهم، بعضهم بـ يستقبل الحالة مباشرة، والبعض الآخر بـ يطلب منك أن دكتور بيطري يشوف الحالة ويكتب لها الأدوية وهم بـ يراعوها بعد كده.

ساعات الواحد بـ يكون عاوز قط أو كلب له مواصفات معينة، لكن محلات القطط والكلاب بأسعارها الفلكية مش بـ تلبي احتياجات، في حين أن الملاجئ دي بـ توفر حيوانات كثير، معظمهم مر بظروف صعبة، لذلك بـ تكون درجة حنيتهم ولطفهم أعلى من أي حيوان ثاني ممكن تتعاملوا معاه، وكمان بـ تكون مجانية أو مقابل تبرع بسيط للملجأ.

 في السطور الجاية هـ نقول لكم على مجموعة من الملاجئ دي وانطباع مجموعة كبيرة من المتعاملين معاها:

جميعة إيسما (الجمعية المصرية للرحمة بالحيوان)

من أفضل وأشهر الجمعيات، وأفضلهم سمعة بين محبي الحيوانات هي جمعية إيسما، ودي لها ملجأين: الأول للكلاب في المنصورية، طريق سقارة، أبو صير، والثاني للقطط في المريوطية، طريق صقارة، شبرامنت، منى خليل من مؤسسي الجمعية ورئيس مجلس إدارتها بـ توصفها أنها جمعية مختصة بحقوق الحيوان والتوعية المجتمعية بالرفق بالحيوان.

كثير من محبي الحيوانات اللي بـ ينقذوا حالات صعبة من الشارع بـ يكون أول مكان يفكروا فيه هو إيسما، منيرة شحاتة واحدة من الناس اللي كرسوا نفسهم لإنقاذ الحيوانات  المصابة أو المريضة أو اللي محتاجة رعاية من الشارع، ومن المتعاملين مع إيسما قالت لنا عنها أنها بـ تستقبل حالات كثير، لدرجة أن إجمالى الحيوانات عندهم بـ يتعدى الألف ومائتين حيوان: ما يقرب من 600 قطة، وزيهم كلاب، مصاريفهم ضخمة، وبـ يحتاجوا تطعيمات وأكل، وعلاج ورعاية، وعدد كبير من العمال، لذلك هي دائمًا بـ تدعو معارفها وأصدقاءها أنهم يتبرعوا للمكان أو يساهموا في تخفيف الحمل عنه من خلال تبني قطط وكلاب غاية في الجمال واللطف، بـ تتكلم عنهم إيسما في الموقع الرسمي بتاعها بطريقة ظريفة.

لو مهتمين تعرفوا الحيوانات المتاحة للتبني ممكن تزوروا صفحة إيسما على الفيسبوك.

جمعية سبير (الجمعية المصرية لحماية حقوق الحيوان)

الجمعية في منطقة شبرامنت بسقارة، مهمتها الرئيسية تحسين حالة الرفق بالحيوان في مصر، والعناية بالحيوانات اللي تم الاعتداء عليها، وتوفير العلاج الطبي وإعادة التأهيل، وتعقيم الحيوانات للحد من الإنجاب والرعاية الطبية المجانية للحيوانات.

سبير كمان بـ تتيح الحصول على كلاب وقطط من عندها سواء كان الشخص اللي هـ يحصل على الحيوان من مصر أو الخارج، لكن للأسف سبير المكان عندها صغير، ومؤخرًا أعلنوا أنهم ما عادوش قادرين على استقبال حيوانات ثاني لأن المكان أصبح فيه أكثر من العدد الطبيعي، وعلشان الحيوانات ما تضايقش بعضها وتتخانق.

لو بـ تحبوا الكلاب والقطط ممكن تروحوا هناك وتخلصوا إجراءات الحصول على قطة أو كلب، ساعتها هـ تفضوا مكان لحيوان جديد محتاج إيواء، لو عاوزين تعرفوا أكثر عنها ممكن تزوروا صفحتهم على الفيسبوك، أو الموقع.

إيساف جمعية أصدقاء الحيوان

الجمعية دي كمان في شبرامنت زي كثير من ملاجئ الحيوانات، عنوانها بالضبط زاوية أبو مسلم، شبرامنت، شارع المريوطية، الهرم، الجيزة.

صاحب الجمعية الأستاذ أحمد الشربيني، أما الجمعية نفسها فهي غير ربحية، بـ تلتزم بتوفير مأوى وبرنامج تأهيل وإنقاذ للحيوانات المريضة والمجروحة وغير المرغوب فيها، وبـ تساعد السكان في المناطق المختلفة أنهم يسيطروا على ظاهرة الحيوانات الضالة لكن بطريقة إنسانية زي التعقيم بدل الموت بالسم.

الجمعية كمان بـ تحاول تدخل مبادئ الرفق بالحيوان للجمهور المصري، خاصة الأطفال من خلال ورش عمل، وفصول تعليم، وزيارات للمدارس، الجمعية كمان بـ تنزل للشارع في حملات للرفق مش بس بالقطط والكلاب، لكن كمان للرفق بالحمير والخيول في مناطق زي نزلة السمان وغيرها.

ممكن تزوروا صفحتهم على الفيسبوك.

جمعية لمسة الحياة

منظمة خيرية برضه، بـ يديرها بعض الفرنسيين في القاهرة، بـ تحاول تعمل حاجة للحيوانات اللي بـ تعيش واقع بائس هنا في مصر، خصوصًا القطط والكلاب الكفيفة، أو المعاقين، أو اللي عندهم بتر أو بعض الحالات المرضية، أو اللي أصحابها رموها في الشارع من غير رحمة ومش قادرين يعيشوا في الشارع.

الجمعية دي كويسة جدًا جدًا، لكن طبعًا التبرعات قليلة جدًا، بـ يحاولوا يكفوا القطط اللي عندهم، وبـ يعافروا بالإمكانيات الموجودة، بشهادة كثير من الزوار بـ يبذلوا قصارى جهدهم ومش بـ يقصروا في حق الحيوانات الموجودة.. بشوية مساعدة واهتمام من الناس ممكن تفيد قطاع أوسع من الحيوانات.

الجمعية مكانها برضه في شبرامنت، ممكن تعرفوا عنهم أكثر من خلال صفحتهم على الفيسبوك.

بوز أند كلوز

ملجأ في منطقة سقارة، بـ يستقبل حيوانات كثير، لكن المشكلة أن بعض المترددين عليه كان لهم انطباع مش تمام قوي منها، وناس مؤخرًا قررت تستعيد الحيوانات اللي أنقذوها من هناك بدعوى أن الملجأ مافيهوش خبرة وأن المكان من ناحية الأكل والعلاج محتاج رعاية أكبر لأن بعض الحيوانات توفيت بسبب الإهمال، وعدم استعداد المكان لاستقبال أعداد من القطط والكلاب اللي بعضهم بـ يهرب أحيانًا.

على كل ده كان انطباع.. في حين أن بعض الانطباعات الثانية شكرت في المكان وقالت أنه رائع وجميل جدًا وفي طريقه أن يكون أفضل الأماكن الخاصة برعاية الحيوانات الضالة، نتمنى أنهم يحسنوا من أدائهم وما نشوفش شكوى منهم أبدًا، خلينا نحكي قصة عن المكان ده والقائمين عليه، لما سافروا مرة من القاهرة لحد السويس علشان ينقذوا كلب رجله الاثنين مقطوعين، وفي حالة سيئة جدًا.

هم نفسهم اعترفوا بمشكلتهم وكتبوا على صفحتهم الخاصة: “فى بوز أند كلوز قمنا بعملنا مستخدمين أقصى قدراتنا ومن خلال قيود عديدة أحاطت بنا منذ البداية من أربعة أشهر مضت، نعم قد نكون تناولنا الأمور بطريقة خاطئة فى بعض الأحيان، ولكن كما أخطأنا أحيانًا، هناك أيضًا العديد والعديد من قصص النجاح والعديد من الأرواح الغالية التى أنقذت من مصر كلها وليس القاهرة فقط، بالرغم من مواردنا المحدودة مقارنة بحجم مشكلة الحيوانات الضالة فى مصر، أننا ندعو كل من يرغب فى مساعدة هذه المخلوقات الجميلة الصامتة أن يتعاون معنا فى الرقى بهذا الملجأ بدلاً من إضافة عقبات للعقبات التى نواجهها فعلاً، نحن نطلب من جميع هؤلاء الذين يتفاعلون بقوة مع هذه القضية أن يساعدوا الحيوانات بطريقة إيجابية وهادئة وبناءة، نحن جميعًا نختلف فى وجهات النظر ولكننا جميعًا أيضًا نسعى إلى خير هذه الحيوانات، فلتعطونا فرصة فلم نلبث إلا أربعة أشهر فقط، جل من لا يخطئ”.

لو عاوزين تتفاعلوا معاهم زوروا صفحتهم على الفيسبوك.