Mohammed Sabry
الإنترنت بقى جزء أساسي ومهم من حياتنا. خاصة في الشغل. طبعًا لما بيفصل بتبقى مشكلة كبيرة، وبتضطر تسلي وقتك بأي حاجة لحد ما يرجع. وغالبًا مش بتلاقي قدامك غير لعبة سوليتير. بس تعرف إن في ألعاب تانية، مش بتحتاج إنترنت علشان تلعبها؟ الألعاب دي حسب ما نشرها “218TV” هي:
1- Contract Killer 2
لو بتحب ألعاب الأكشن والإثارة، يبقى دي لعبتك. بتكون فيها قاتل محترف اسمه “جاك جريفن”. وبتتعاقد معاك جهة رسمية، علشان تقضي على عصابة كاملة. فبتروح المكان المطلوب وتدرسه كويس، وتبدأ مهمتك. وممكن تتلعب بالإنترنت أو من غيره.
2- Vector
في رحلة هروب “فيكتور”، بيتعرض لعدد من الحواجز الصعبة. وانت مطلوب منك تساعده بالقفز والتسلق. لعبة محتاجة تركيز. وكل ما تتقدم في اللعبة، الصعوبة بتزيد.
3- Twist
لعبة مناسبة جدًا لوقت فراغك في الشغل أو خلال الدراسة. وفيها انت بتتحكم في كورة بتمشي على مكعبات، لكن بتتنقل يمين وشمال بس. من غير تتحرك لقدام. انت بتحرك الكورة بصباعك يمين وشمال.
4- Brother in Arms 3: Sons of War
دي مناسبة لكل اللي بيحبوا أجواء الحروب. بتكون انت الرقيب “رايت”، قائد مجموعة من الجنود. وبتحاربوا النازيين. وطبعًا مع كل مرحلة بتزيد صعوبة، ومعاها بتزيد أسلحتك.
5- Earn to Die
الزومبي سيطروا على الأرض. انت لك وجهة معينة لازم توصلها ومعاك عربية. لازم تواجه المخاطر وتقتل الزومبي. وكمان بتكسب فلوس تخليك تشتري بنزين للعربية.
6- Ninja Arashi
بتكون فيها محارب نينجا، الشرير Orochi خطف أبوه. ولازم تقاتل كل أعدائك علشان تنقذه. فيها شبه من لعبة Vector، من حيث أساليب الهروب والحواجز.
7- King of Dirt
مطلوب منك في اللعبة إنك تجتاز مجموعة من المراحل، وانت راكب العجلة. وده من خلال عدد من الحركات الاستعراضية الممتعة اللي هتقوم بها.
يلا حمل اللعبة اللي عجبتك.. بس لو مديرك قفشك، إحنا مانعرفكش.
مقترح
مطاعم
3 أماكن في القاهرة بتعمل أحلى شاورما لبناني
احلى شاورما لبناني في القاهرة شاورما +3
معالم وسياحة
